លេចចេញជំងឺអាថ៌កំបាំងនៅអង់គ្លេស ឆ្លងក្មេងៗសិស្សសាលាមត្តេយ្យ

កាលពីថ្ងៃព្រហស្បតិ៍ទី៣ខែកុម្ភៈ សេវាពន្លត់អគ្គិភ័យនិងជួយសង្គ្រោះតំបន់ Cambridgeshire ត្រូវ​បាន​គេ​ហៅ​ទៅសាលាមត្តេយ្យមួយ​កន្លែង បន្ទាប់​ពី​មាន​ការ​ផ្ទុះ​ជំងឺ​ដ៏​អាថ៌កំបាំង។

បុគ្គលិក និងកុមារមួយចំនួនត្រូវបានគេរាយការណ៍ថា មានជំងឺនៅសាលាមត្តេយ្យ Kindred Huntingdon Day ក្នុងទីក្រុង Brampton នៃតំបន់ Cambridgeshire។

សារព័ត៌មាន​ Cambridgeshire Live បានរាយការណ៍ថា ឪពុកម្តាយត្រូវបានជូនដំណឹង ហើយកុមារមានសុវត្ថិភាព និងត្រូវបានមើលថែនៅពេលនេះ។

សេវានេះកំពុងធ្វើការជាមួយទីភ្នាក់ងារសន្តិសុខសុខភាពចក្រភពអង់គ្លេស និងសាលា ដើម្បីកំណត់ថាតើមូលហេតុបណ្តាលមកពីអ្វី ហើយថាតើត្រូវចាំបាច់ ដាក់ចេញនូវវិធានការណាមួយ ដើម្បីបញ្ឈប់ករណីមិនឲ្យកើតឡើងបន្ថែមទៀត ដែរឬក៏អត់។

ទោះបីជាយ៉ាងណាក៏ដោយ  គេជឿថា ជំងឺដ៏អាថ៌កំបាំងនេះមិនបង្កហានិភ័យធំសម្រាប់សហគមន៍ទេ។

កុមារត្រូវបានគេរាយការណ៍ថា មានឡើងកន្ទួលលើរាងកាយ និងក្អក ខណៈផ្លូវក្នុងតំបន់ក៏ត្រូវបានបិទ ផ្អាកការធ្វើចរាចរណ៍ផងដែរ។

សេចក្តីថ្លែងការណ៍រួមមួយ បានបញ្ជាក់ថា មនុស្សចំនួន១៣នាក់ក្នុងចំណោម ៦៨នាក់នៅខាងក្នុងសាលា កំពុងចេញរោគសញ្ញា។ សេចក្តីថ្លែងការណ៍បន្តថា “កុមារ និងបុគ្គលិកមួយចំនួនតូចនៅសាលាមត្តេយ្យមានអារម្មណ៍មិនស្រួលខ្លួន ហើយបានជួបប្រទះនូវរោគសញ្ញាមួយចំនួន។ បច្ចុប្បន្នយើងកំពុងស៊ើបអង្កេតមូលហេតុនៃបញ្ហានេះ”៕

ប្រែសម្រួល៖ Vann Vann

ប្រភព៖ Daily Star

ចុចអាន៖ លេចចេញជំងឺអាថ៌កំបាំងមួយទៀត ពេលនេះសម្លាប់មនុស្សជិត ១០០នាក់ហើយ