ប្រទេសប៉េរូ ប្រកាសអាសន្នសុខភាព ដោយសារជំងឺ ដែលបណ្តាលឲ្យខ្វិន

ប្រទេសប៉េរូ កំពុងរងគ្រោះដោយរលកដ៏អាថ៌កំបាំងនៃជំងឺដែលបណ្តាលឲ្យខ្វិន ជាហេតុជំរុញឲ្យមានការប្រកាសអាសន្នសុខភាពថ្នាក់ជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចាប់តាំងពីដើមឆ្នាំមក​ ជំងឺ Guillain-Barré Syndrome (GBS) ចំនួន២៣១ករណីត្រូវបានកត់ត្រា ដោយក្នុងនោះមានជាងពាក់កណ្តាល បានកើតឡើងនារយៈពេល៥សប្តាហ៍គិតចាប់ពីដើមខែមិថុនា ដល់ពាក់កណ្តាលខែកក្កដា។

អ្នកជំងឺភាគច្រើនជួបប្រទះនូវទម្រង់វិវឌ្ឍន៍នៃភាពខ្វិន ដែលចាប់ផ្តើមនៅជើង រួចរាលដាលបន្តិចម្តងៗឡើងទៅដល់ដងខ្លួន និងផ្នែកខាងលើ។

រោគសញ្ញានៃជំងឺនេះគឺឈឺចុកចាប់ពេញរាងកាយ ហើយឈានដល់កម្រិតធ្ងន់ធ្ងរក្នុងរយៈពេល៤សប្តាហ៍។ មនុស្សប្រុសអាយុ៣០ឡើង គឺងាយរងគ្រោះដោយសារជំងឺនេះណាស់។

មន្ត្រីសុខាភិបាលប៉េរូ បានយកសំណាកអ្នកជំងឺទៅពិនិត្យ ដោយរកឃើញបាក់តេរីមួយប្រភេទឈ្មោះ Campylobacter jejuni ដែលជាទូទៅមាននៅក្នុងអាហារនិងទឹកកខ្វក់។

ថ្វីបើ GBS អាចធ្វើឲ្យពិការក៏ពិតមែនប៉ុន្តែ វាកម្របណ្តាលឲ្យស្លាប់ណាស់ ហើយក៏មិនឆ្លងរវាងមនុស្សនិងមនុស្សដែរ។

ទោះបីជាយ៉ាងណាក៏ដោយ ទាំងរដ្ឋាភិបាលប៉េរូ និងអង្គការសុខភាពពិភពលោក ឬអង្គការសុខភាព Pan American មិនរឹតបន្តឹងការធ្វើដំណើរណាមួយឡើយ ជុំវិញការផ្ទុះមេរោគ GBS នេះ៕

ប្រែសម្រួល៖ Vann Vann

ប្រភព៖ Daily Mail