ក្មេងប្រុសម៉ារ៉ុក ជាប់ក្នុងអណ្តូងជម្រៅ៣២ម៉ែត្រ ពេលនេះស្លាប់ហើយ (មានវីដេអូ)

ក្មេងប្រុសជនជាតិម៉ារ៉ុកអាយុ ៥ឆ្នាំម្នាក់ ដែលជាប់ក្នុងអណ្តូងអស់រយៈពេល ៤ថ្ងៃ ពេលនេះបានបាត់បង់ជីវិតហើយ បើទោះបីជាមានកិច្ចខិតខំប្រឹងប្រែងយ៉ាងខ្លាំងក្នុងការជួយសង្គ្រោះក៏ដោយ។

សេចក្តីថ្លែងការណ៍មួយបានប្រកាសពីការស្លាប់ ភ្លាមៗបន្ទាប់ពីការយក Rayan ចេញពីអណ្តូង។

ការព្យាយាមដើម្បីជួយសង្គ្រោះក្មេងប្រុស បានអង្រួនប្រទេសនេះ ដោយមានមនុស្សរាប់រយនាក់មកប្រមូលផ្តុំគ្នានៅជិតអណ្តូង និងរាប់ពាន់នាក់ទៀតតាមដានព័ត៌មាននៅតាមអ៊ីនធើណិត។

ក្មេងប្រុសរូបនេះបានធ្លាក់ចុះជម្រៅ៣២ម៉ែត្រ តាមរយៈប្រហោងដ៏តូចចង្អៀតរបស់អណ្តូង ខណៈការ​ជួយ​សង្គ្រោះ​ត្រូវ​បាន​រារាំង​ដោយ​ភាព​ភ័យ​ខ្លាចនៃបំណាក់ដី។

ទោះបីជាយ៉ាងណាក៏ដោយ នៅទីបំផុត ក្រុមអ្នកជួយសង្គ្រោះបានយកក្មេងប្រុសចេញពីអណ្តូងកាលពីល្ងាចថ្ងៃសៅរ៍។

ទោះភ្លាមនោះ មិនមានការបញ្ជាក់អំពីស្ថានភាពរបស់គាត់ក៏ដោយ ប៉ុន្តែការជួយសង្គ្រោះបានទទួលការអបអរសាទរពីហ្វូងមនុស្សយ៉ាងច្រើនកុះករ។

ប៉ុន្តែ​ជាអកុសល អ្វីៗ​បាន​ក្លាយ​ទៅ​ជា​ការ​សោកស្ដាយ​នៅ​ប៉ុន្មាន​នាទី​ក្រោយ​មក នៅ​ពេល​សេចក្តីថ្លែងការណ៍​បាន​​ប្រកាស​ថា Rayan ទទួលមរណភាពហើយ។

ឪពុករបស់ Rayan កំពុងជួសជុលអណ្ដូងនៅពេលគ្រោះថ្នាក់កើតឡើង។ គាត់​បាន​និយាយ​ថា ​កូន​ប្រុសរបស់​គាត់​បានធ្លាក់ចូលអណ្តូង ​នៅ​ពេល​ដែល​គាត់ភ្លេចខ្លួនមួយភ្លែត។

ដឹកនាំដោយនាយកដ្ឋានការពារស៊ីវិលរបស់ប្រទេសម៉ារ៉ុក ប្រតិបត្តិការជួយសង្គ្រោះនៅក្នុងទីក្រុងតូចមួយនៃភាគខាងជើង Tamorot បានចាប់ផ្តើមកាលពីល្ងាចថ្ងៃអង្គារ។

ល្បាយនៃដីលាយថ្ម និងខ្សាច់បានបង្កជាគ្រោះថ្នាក់ខ្លាំងបំផុត សម្រាប់ប្រតិបត្តិការជួយសង្គ្រោះ។ ផ្ទុយទៅវិញ គ្រឿងចក្រឈូសឆាយ ត្រូវបានប្រើដើម្បីជីកផ្លូវដ៏ធំមួយនៅជាប់នឹងអណ្តូងនោះ។

វីដេអូកាលពីថ្ងៃព្រហស្បតិ៍ ពីកាមេរ៉ាដែលទម្លាក់ចូលទៅក្នុងអណ្តូងបានបង្ហាញថា ក្មេងប្រុសរូបនេះនៅរស់ និងដឹងខ្លួន ប៉ុន្តែមិនមានការអាប់ដេតព័ត៌មានអំពីស្ថានភាពរបស់គាត់ទេ ចាប់តាំងពីពេលនោះមក។

ក្រុមអ្នកជួយសង្គ្រោះបានព្យាយាមផ្តល់អុកស៊ីហ្សែន អាហារ និងទឹកទៅឲ្យក្មេងប្រុស ប៉ុន្តែគេមិនដឹងច្បាស់ថាតើគាត់អាចប្រើប្រាស់អុកស៊ីហ្សែន​ ឬញ៉ាំអាហារនិងផឹកទឹកបានឬក៏អត់នោះទេ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC