បរាជ័យរបស់ បែលហ្ស៊ិក យប់មិញ ប្រែក្លាយទៅជាកុបកម្ម ពាសពេញទីក្រុង

ក្រុម​កុបកម្ម ​បាន​ចាប់​ផ្តើម​ដុតភ្លើង​និងយកឥដ្ឋគប់ររថយន្ត ​ក្នុង​ទីក្រុង​ព្រុចសែល បន្ទាប់​ពី​ក្រុមបាល់ទាត់ជម្រើសជាតិ បែលហ្ស៊ិក ​ចាញ់​ម៉ារ៉ុក ដោយ​លទ្ធផល ២-០ ក្នុង​ព្រឹត្តិការណ៍ World Cup។

ជ័យជម្នះរបស់ម៉ារ៉ុក គឺជាការខកចិត្តដ៏ធំមួយនៅក្នុងការប្រកួតសម្រាប់បែលហ្ស៊ិក ខណៈក្រុមជនអន្តោប្រវេសន៍ម៉ារ៉ុកនៅក្នុងទីក្រុងនានានៃប្រទេសបែលហ្ស៊ិក បានចេញមកអបអរយ៉ាងហ៊ឹកហ៊ាក់។

ប៉ូលិសត្រូវបង្ខំចិត្តបិទផ្នែកខ្លះនៃរាជធានីរបស់ប្រទេសបែលហ្ស៊ិក និងទីក្រុងកំពង់ផែ Antwerp ខណៈក្រុមមន្រ្តីក៏បានដាក់ពង្រាយកាណុងបាញ់ទឹក និងបាញ់ឧស្ម័នបង្ហូរទឹកភ្នែក ដើម្បីបំបែកហ្វូងមនុស្សផងដែរ នៅពេលអំពើហិង្សាផ្ទុះឡើង ក្រោយចប់ការប្រកួត។

យោងតាមអ្នកនាំពាក្យប៉ូលិសម្នាក់, កុបកររាប់សិបនាក់ បានដុតភ្លើង និងគប់ដុំឥដ្ឋដាក់រថយន្ត មុនពេលសមត្ថកិច្ចចូលទៅធ្វើអន្តរាគមន៍។ អ្នកគាំទ្ររាប់សិបនាក់ ក៏បានវាយកម្ទេចបង្អួចហាង បាញ់កាំជ្រួច និងដុតរថយន្តផងដែរ។

រឿងហេតុស្រដៀងគ្នានេះ ក៏បានកើតឡើងនៅទីក្រុងកំពង់ផែ Antwerp ផងដែរ ជាកន្លែងដែលប៉ូលិស បញ្ជាឲ្យផ្អាកចរាចរណ៍ផ្លូវដែក។

ប៉ូលិសក្រុងព្រុចសែល បាននិយាយនៅក្នុងសេចក្តីថ្លែងការណ៍មួយថា សូម្បីតែមុនពេលចប់ការប្រកួត មនុស្សរាប់សិបនាក់ ក៏ព្យាយាមប្រឈមមុខជាមួយប៉ូលិសផងដែរ ដែលធ្វើឲ្យប៉ះពាល់ដល់សុវត្ថិភាពសាធារណៈ។

លោក Philippe Close អភិបាលក្រុង ព្រុចសែល បាននិយាយថា “ខ្ញុំសូមថ្កោលទោសយ៉ាងខ្លាំងក្លាបំផុតចំពោះឧប្បត្តិហេតុនៅថ្ងៃនេះ។ ប៉ូលិស​បាន​ធ្វើ​អន្តរាគមន៍​យ៉ាង​តឹងរ៉ឹង​។ ដូច្នេះហើយ ខ្ញុំ​សូម​ណែនាំ​អ្នក​គាំទ្រ​ដែល​មក​កណ្តាល​ក្រុង។ ប៉ូលិសកំពុងធ្វើអស់ពីសមត្ថភាព ដើម្បីរក្សាសណ្តាប់ធ្នាប់សាធារណៈ។ ខ្ញុំចេញបញ្ជាឲ្យប៉ូលិស ចាប់ខ្លួនអ្នកបង្កបញ្ហា”។

គួរបញ្ជាក់ថា បែលហ្ស៊ិក​ គឺជាប្រទេសមានជនជាតិដើមម៉ារ៉ុកប្រហែល ៥០០ ០០០នាក់៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ កីឡាករអ៊ីរ៉ង់ ច្រៀងចម្រៀងជាតិឡើងវិញ ធ្វើឲ្យអ្នកគាំទ្រ ទ្រហោយំក្នុងកីឡដ្ឋាន