ពូទីន ទទួលស្គាល់ឯករាជ្យតំបន់ចំនួន២ ក្នុងប្រទេសអ៊ុយក្រែន ពេលនេះបញ្ជាឲ្យដាក់ទ័ពចូលទៅហើយ (មានវីដេអូ)

កាលពីថ្ងៃចន្ទ ទី២១ ខែកុម្ភៈ លោកប្រធានាធិបតី វ្ល៉ាឌីមៀរ ពូទីន បានបញ្ជាឲ្យកងទ័ពរុស្ស៊ី ចូលទៅក្នុងតំបន់ឧទ្ទាម ដែលគាំទ្រដោយទីក្រុងមូស្គូ នៃប្រទេសអ៊ុយក្រែន ក្នុងសកម្មភាពមួយ ដែលអាចបញ្ឆេះសង្រ្គាមដ៏មហន្តរាយ ជាមួយទីក្រុងគៀវ។

មុននេះ មេដឹកនាំវិមានក្រឹមឡាំង បានទទួលស្គាល់ឯករាជ្យនៃតំបន់កាន់កាប់ដោយក្រុមឧទ្ទាមចំនួនពីរគឺតំបន់ Donetsk និង Luhansk ក្នុងប្រទេសអ៊ុយក្រែន ដែលនេះនឹងបើកផ្លូវសម្រាប់ប្រតិបត្តិការមួយដើម្បីដាក់ពង្រាយកងកម្លាំង។

នៅក្នុងអនុក្រឹត្យផ្លូវការចំនួនពីរ លោក ពូទីន បានណែនាំឲ្យក្រសួងការពារជាតិ ទទួលការងាររក្សាសន្តិភាព នៅក្នុងតំបន់ Donetsk និង Luhansk។ នៅក្នុងអនុក្រឹត្យដដែលនោះ លោក ពូទីន ក៏បានបញ្ជាឲ្យក្រសួងការបរទេសបង្កើតទំនាក់ទំនងការទូត ជាមួយសាធារណរដ្ឋទាំង២ផងដែរ។

ការទទួលស្គាល់សាធារណរដ្ឋបំបែកខ្លួន ដែលកាន់កាប់ដោយក្រុមឧទ្ទាមគាំទ្រដោយរុស្ស៊ីចាប់តាំងពីឆ្នាំ២០១៤នេះ បានបង្កឲ្យមានការថ្កោលទោសជាអន្តរជាតិ និងការសន្យាដាក់ទណ្ឌកម្ម ពីសំណាក់សហរដ្ឋអាមេរិក និងសហភាពអឺរ៉ុប។

នៅក្នុងសុន្ទរកថាជាតិរយៈពេល៦៥នាទី ពីការិយាល័យវិមានក្រឹមឡាំង ដែលចាក់ផ្សាយតាមទូរទស្សន៍ លោក ពូទីន បានរិះគន់អ៊ុយក្រែន ថាជារដ្ឋបរាជ័យ និងជាអាយ៉ងរបស់បស្ចិមប្រទេស ដោយលើកឡើងម្តងហើយម្តងទៀតថា វាជាផ្នែកសំខាន់នៃប្រទេសរុស្ស៊ី។

លោកបានចោទប្រកាន់អាជ្ញាធរនៅទីក្រុង គៀវ ពីបទធ្វើទុក្ខបុកម្នេញជនជាតិរុស្ស៊ី និងរៀបចំ “សង្គ្រាមផ្លេកបន្ទោរ” ប្រឆាំងតំបន់បំបែកខ្លួន Donetsk និង Luhansk នៅភាគខាងកើតប្រទេស អ៊ុយក្រែន។

លោកពូទីន និយាយថា “ចំពោះអ្នកដែលដណ្តើមកាន់កាប់ និងកាន់អំណាចនៅក្នុងទីក្រុង គៀវ យើងទាមទារឲ្យបញ្ចប់ប្រតិបត្តិការយោធារបស់ពួកគេជាបន្ទាន់។ បើមិនដូច្នេះទេ របបដែលកំពុងកាន់អំណាចនៅអ៊ុយក្រែន ត្រូវទទួលខុសត្រូវចំពោះការបង្ហូរឈាមណាមួយ”។

លោក ពូទីន អះអាងថា វាចាំបាច់ដើម្បីធ្វើការសម្រេចចិត្ត ក្នុងការទទួលស្គាល់ឯករាជ្យភាពនៃតំបន់ទាំងពីរភ្លាមៗ។

ឥឡូវនេះ រុស្ស៊ីនឹងដាក់ពង្រាយកងទ័ព ដោយមានការគាំទ្រពីមន្ត្រីក្នុងតំបន់បំបែកខ្លួនទាំង២ ហើយអ៊ុយក្រែននឹងត្រូវតែទទួលយកការបាត់បង់ទឹកដីដ៏ធំ បើមិនដូច្នោះទេ នឹងប្រឈមជម្លោះប្រដាប់អាវុធជាមួយប្រទេសជិតខាងដ៏មានឥទ្ធិពលខ្លាំងជាងខ្លួន៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNA

ចុចអាន៖ ចារកម្មអាមេរិកទម្លាយ ក្រុមមនុស្សក្នុងបញ្ជីដែល រុស្ស៊ី នឹងសម្លាប់ ក្រោយចូលកាន់កាប់ អ៊ុយក្រែន