លោក ប្រាយុទ្ធ ស្នើឲ្យប្រជាជនយោគយល់អំពីបញ្ហាប្រេងសាំង និងទំនិញឡើងថ្លៃ

ប្រភពព័ត៌មានបានឲ្យដឹងថា នាយករដ្ឋមន្ត្រីថៃលោក ប្រាយុទ្ធ ចាន់អូចា បានស្នើសុំឲ្យប្រជាពលរដ្ឋយល់អំពីព្រឹត្តិការណ៍ជម្លោះរវាងរុស្ស៊ី និងអ៊ុយក្រែន ដែលប៉ះពាល់ដល់តម្លៃប្រេងសាំង និងទំនិញឡើងថ្លៃ ។

នៅក្នុងកិច្ចប្រជុំគណៈរដ្ឋមន្ត្រីថៃកាលពីថ្ងៃទី១០ ខែមីនា ក៏មានការពិភាក្សាអំពីស្ថានការណ៍សង្គ្រាមរវាងរុស្ស៊ី និងអ៊ុយក្រែន ដែលកំពុងតានតឹងខ្លាំងផងដែរ ។

ពាក់ព័ន្ធនឹងបញ្ហានេះដែរ នាយករដ្ឋមន្ត្រីលោក ប្រាយុទ្ធ ចាន់អូចា បានលើកឡើងក្នុងកិច្ចប្រជុំនោះ ដោយស្នើសុំឲ្យសមាជិកគណៈរដ្ឋមន្ត្រីគ្រប់គ្នាពន្យល់ទៅប្រជាពលរដ្ឋអំពីស្ថានភាពវិបត្តិថាមពល និងវិបត្តិទំនិញឡើងថ្លៃ ថាជាបញ្ហាដែលបង្កឡើងដោយឥទ្ធិពលនៃសង្គ្រាមដែលទំនងជាបន្តអូសបន្លាយយូរតទៅទៀត ដើម្បីធ្វើយ៉ាងណាឲ្យប្រជាពលរដ្ឋបានយល់ ។

ទន្ទឺមនោះ លោក ប្រាយុទ្ធ បញ្ជាក់ថា រដ្ឋាភិបាលនឹងឆ្ពោះទៅមុខយ៉ាងពេញទំហឹងក្នុងការជួយដល់ប្រជាពលរដ្ឋ ប៉ុន្តែទោះជាយ៉ាងណា វាក៏អាស្រ័យលើកត្តាថវិកាផងដែរ ៕

ប្រែសម្រួលដោយ ៖ គង់ សំអាន

ប្រភព ៖ Siam Rath

ចុចអាន ៖ ជនជាតិ រុស្ស៊ី រាប់ពាន់នាក់ជាប់គាំងនៅ ថៃ បន្ទាប់ពី Visa និង Mastercard របស់ពួកគេផ្អាកប្រតិបត្តិការ