ព័ត៌មានអន្ដរជាតិ

ណាតូ ស្វាគមន៍ប្រទេសអឺរ៉ុប ២ នេះជានិច្ចឲ្យតែចង់ចូលជាសមាជិក

បានផុស

៣ years មុន

នៅ

ថ្ងៃអង្គារ ៥ មេសា ២០២២

ដោយ

អគ្គលេខាធិការអង្គការណាតូលោក Jens Stoltenberg បាននិយាយថា ប្រទេសហ្វាំងឡង់ និងស៊ុយអែត នឹងត្រូវបាននាំចូលជាសមាជិកអង្គការណាតូភ្លាមៗ ប្រសិនបើពួកគេចង់ ដោយសារការលុកលុយរបស់រុស្ស៊ីលើអ៊ុយក្រែន បង្កឲ្យមានការព្រួយបារម្ភផ្នែកសន្តិសុខនៅផ្នែកខាងកើតនៃប្លុកនេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Stoltenberg បាននិយាយនៅក្នុងបទសម្ភាសន៍ជាមួយ CNN ថា “ពិតណាស់ វាគឺផ្អែកលើពួកគេក្នុងការសម្រេចចិត្ត ប្រសិនបើពួកគេចង់ចូលក្នុងសម្ព័ន្ធភាពរបស់យើង ខ្ញុំរំពឹងថា ពួកគេនឹងត្រូវបានស្វាគមន៍យ៉ាងខ្លាំងពីសម្ព័ន្ធមិត្តទាំង ៣០ ហើយយើងនឹងស្វែងរកវិធីដ៏រហ័សដើម្បីនាំពួកគេចូលទៅក្នុងសម្ព័ន្ធភាពរបស់យើង ។

លោក Stoltenberg បានធ្វើអត្ថាធិប្បាយបែបនេះ បន្ទាប់ពីបានជួបពិភាក្សាកាលពីសប្តាហ៍មុនជាមួយប្រធានាធិបតីហ្វាំងឡង់លោក Sauli Niinisto ហើយលោកក៏បាននិយាយដែរថា ប្រទេសស៊ុយអែតក៏ដូចគ្នានឹងប្រទេសហ្វាំងឡង់ផងដែរ ។

លោកអគ្គលេខាធិការរូបនេះបាននិយាយថា “យើងគោរពអធិបតេយ្យភាព និងបូរណភាពទឹកដីនៃប្រទេសហ្វាំងឡង់ និងសិទ្ធិរបស់ពួកគេក្នុងការសម្រេចចិត្តអនាគតរបស់ពួកគេ ។ នោះជាអ្វីដែលរុស្ស៊ីមិនគោរព ព្រោះពួកគេពិតជាព្យាយាមបំភិតបំភ័យ និងនិយាយថា ប្រសិនហ្វាំងឡង់សម្រេចចិត្តចូលជាសមាជិកណាតូ នោះនឹងមានផលវិបាក” ៕

ប្រែសម្រួលដោយ ៖ ជីវ័ន្ត

ប្រភព ៖ RT

ចុចអាន ៖ វិមានក្រឹមឡាំង ថា បើអ្នកណាហ៊ានវ៉ៃប្រទេសសម្ព័ន្ធមិត្តខ្លួនមួយនេះ ដូចវាយប្រហារលើ រុស្ស៊ី