បុរសដែលលោក ពូទីន ទើបតែងតាំងជាមេបញ្ជាការកំពូល ឲ្យដឹកនាំសង្គ្រាមនៅ អ៊ុយក្រែន ជានរណា? (មានវីដេអូ)

ស្របពេលសង្រ្គាមកំពុងបន្ត រុស្ស៊ីបានតែងតាំងឧត្តមសេនីយ៍ឈ្មោះ Alexander Dvornikov ជាមេបញ្ជាការថ្មីនៃប្រតិបត្តិការយោធានៅអ៊ុយក្រែន ខណៈយោធារបស់លោកប្រធានាធិបតី វ្លាឌីមៀរ ពូទីន ផ្លាស់ប្តូរផែនការ បន្ទាប់ពីបរាជ័យក្នុងការដណ្តើមយកទីក្រុង កៀវ។

យោងតាម CNN, មេបញ្ជាការស្រុកយោធាភាគខាងត្បូងរុស្ស៊ីរូបនេះ បានដាក់គោលដៅប្រយុទ្ធ ដើម្បីទទួលបានលទ្ធផលវិជ្ជមានឲ្យលោក ពូទីន មុនទិវាជ័យជម្នះថ្ងៃទី៩ខែឧសភា។

ដោយសារតែបទពិសោធន៍យ៉ាងជោកជាំរបស់គាត់ ការិយាល័យប្រធានាធិបតីរុស្ស៊ីជឿជាក់ថា បញ្ជាការរួម និងការគ្រប់គ្រងប្រឆាំងអ៊ុយក្រែន នឹងប្រសើរឡើងក្រោមការដឹកនាំរបស់គាត់។

លោកឧត្តមសេនីយ៍ Dvornikov បានបម្រើការក្នុងមុខតំណែងជាច្រើន អំឡុងពេលកាន់តំណែងរបស់គាត់។ គាត់ត្រូវបានបញ្ជូនទៅកងវរសេនាតូចភាគខាងលិច ហើយត្រូវបានចាត់តាំងទៅកងពលតូចឆ្មាំទី៦ ក្នុងនាមជាមេបញ្ជាការ។ គាត់ក៏បានដឹកនាំកងវរសេនាធំនៅក្នុងផ្នែករថក្រោះឆ្មាំទី១០ និងកងវរសេនាធំកាំភ្លើងធំឆ្មាំទី២ នៅចុងទសវត្សរ៍ឆ្នាំ១៩៩០ផងដែរ។

នៅស្រុកយោធា Caucasus ភាគខាងជើង, លោក Dvornikov បានឡើងឋានន្តរស័ក្តិ ក្លាយជាអគ្គសេនាធិការ ហើយនៅទីបំផុតក្លាយជា មេបញ្ជាការកងពលកាំភ្លើងធំ។

ក្រោយមក គាត់បានក្លាយជាមេបញ្ជាការរង និងជានាយអគ្គសេនាធិការនៃកងវរសេនាធំកាំភ្លើងធំទី៣៦ បន្ទាប់ពីបានបញ្ចប់ការសិក្សាពីបណ្ឌិតសភាយោធាអគ្គសេនាធិការ។ មន្ត្រី​យោធារូបនេះ ​ក៏​បាន​ចូល​កាន់​តំណែង​ជាមេ​បញ្ជាការ​កង​ទ័ពទង់​ក្រហម​ទី៥ ក្នុង​ឆ្នាំ២០០៨ផងដែរ។

លោក Dvornikov អាយុ៦០ឆ្នាំ គឺជាមេបញ្ជាការទីមួយនៃប្រតិបត្តិការយោធារបស់រុស្ស៊ី នៅក្នុងប្រទេសស៊ីរី បន្ទាប់ពីលោក ពូទីន បានបញ្ជូនកងទ័ពនៅទីនោះក្នុងខែកញ្ញាឆ្នាំ២០១៥ ដើម្បីគាំទ្ររដ្ឋាភិបាលរបស់ប្រធានាធិបតីស៊ីរីលោក Bashar al-Assad៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Republic World

ចុចអាន៖ លោក ពូទីន តែងតាំងមេបញ្ជាការថ្មី ឲ្យដឹកនាំសង្រ្គាមនៅអ៊ុយក្រែន ក្រោយវាយយកក្រុង កៀវ មិនបាន