រយៈពេល ៣ ថ្ងៃហើយដែលកម្ពុជាប្រកាសមិនមានករណីឆ្លងវីរុសកូវីដបំប្លែងខ្លួនអូមីក្រុងទាំងក្នុងសហគមន៍ និងករណីនាំចូលពីបរទេស ហើយក៏ជាប្រទេសតែមួយគត់ក្នុងតំបន់អាស៊ានមិនបានរកឃើញករណីឆ្លងប្រចាំថ្ងៃថ្មី ។

នេះជាប្រវត្តិសាស្ត្រថ្មីសម្រាប់កម្ពុជាក្នុងការទប់ស្កាត់ការរីករាលដាលនៃជំងឺកូវីដ ១៩ ក៏ដូចជា វីរុសបំប្លែងខ្លួនអូមីក្រុង ដោយសារតែយុទ្ធនាការចាក់វ៉ាក់សាំងក្នុងក្របខ័ណ្ឌទូទាំងប្រទេសដែលដាក់ចេញដោយរាជរដ្ឋាភិបាលកម្ពុជា ។

ដោយឡែកប្រទេសផ្សេងទៀតនៅក្នុងតំបន់នៅតែកត់ត្រាករណីឆ្លងកូវីដ និងអូមីក្រុង ជាក់ស្ដែងនៅថ្ងៃអង្គារនេះប្រទេសថៃបានប្រកាសរកឃើញអ្នកឆ្លងថ្មីចំនួន ៦,២៣០ ករណី វៀតណាមមានអ្នកឆ្លង ២,១៧៥ ករណី ខណៈប្រទេសក្បែរខាងកម្ពុជាមួយទៀតគឺឡាវបានកត់ត្រាករណីឆ្លងថ្មីចំនួន ១១០ ករណីគិតត្រឹមថ្ងៃចន្ទ ។

ចំណែកប្រទេសម៉ាឡេស៊ីរកឃើញករណីឆ្លងថ្មីចំនួន ២,២៤៦ ករណី, ឥណ្ឌូណេស៊ី ២៥៤ ករណី, ហ្វីលីពីន ១៨២ ករណី, មីយ៉ាន់ម៉ា ៣ ករណី, សិង្ហបុរី ២,២៧១ ករណី និងព្រុយណេ ២៤៩ ករណី ។

សរុបមកថៃគឺជាប្រទេសក្នុងតំបន់អាស៊ានដែលមានករណីឆ្លងកូវីដប្រចាំថ្ងៃច្រើនជាងគេបំផុត ខណៈតាមពីក្រោយដោយប្រទេសសិង្ហបុរី ៕

ប្រែសម្រួលដោយ ៖ ជីវ័ន្ត

ប្រភព ៖ Worldometer

ចុចអាន ៖ ប្រទេសក្បែរខាង កម្ពុជា រកទិសដៅទិញប្រេងតម្លៃថោកពី រុស្ស៊ី