ព័ត៌មានអន្ដរជាតិ

ប៉ូលិសអ៊ីស្រាអែល ប្រើហិង្សាលើអ្នកកាន់ទុក្ខ ក្នុងពិធីបុណ្យសពអ្នកកាសែត Al Jazeera

បានផុស

៤ years មុន

នៅ

ថ្ងៃសៅរ៍ ១៤ ឧសភា ២០២២

ដោយ

ប៉ូលិសអ៊ីស្រាអែល បានវាយអ្នកកាន់ទុក្ខ នៅឯពិធីបុណ្យសពរបស់អ្នកយកព័ត៌មាន Al Jazeera លោកស្រី Shireen Abu Aqla ដែលការសម្លាប់អ្នកស្រីនៅតំបន់ West Bank បានបង្កឲ្យមានកំហឹងយ៉ាងខ្លាំង។

មឈូសរបស់លោកស្រីស្ទើរតែធ្លាក់ដល់ដី ខណៈប៉ូលិស ដោយខ្លះប្រើដំបង បានចូលទៅក្នុងហ្វូងជនជាតិប៉ាឡេស្ទីនដែលប្រមូលផ្តុំគ្នាជុំវិញនោះ។

ប៉ូលិសនិយាយថា ពួកគេបានធ្វើសកម្មភាព បន្ទាប់ពីមានការគប់ដុំថ្ម។

លោកស្រី Abu Aqla ត្រូវបានគេបាញ់សម្លាប់អំឡុងពេលមានជម្លោះកាលពីថ្ងៃពុធ ខណៈអ៊ីស្រាអែល និងប៉ាឡេស្ទីន បានស្តីបន្ទោសដាក់គ្នាទៅវិញទៅមកចំពោះការបាញ់សម្លាប់នេះ។

វីដេអូខ្លីប បានបង្ហាញពីការប្រឈមមុខដាក់គ្នារវាងប៉ូលិស និងជនជាតិប៉ាឡេស្ទីន ដែលបានប្រមូលផ្តុំជុំវិញមឈូសក្នុងបរិវេណមន្ទីរពេទ្យ មុនពេលដែលក្រុមមន្ត្រីបានបង្ក្រាបហ្វូងមនុស្ស ជាមួយនឹងការវាយដំ និងទាត់ធាក់អ្នកកាន់ទុក្ខ។ ប៉ូលិសនិយាយថា ក្រុមមន្ត្រីត្រូវបានគេបង្ខំឲ្យប្រើវិធីសាស្រ្តបំបែកកុបកម្ម។

អ្នកនាំពាក្យលោក Antonio Guterres ដែលជាអគ្គលេខាធិការអង្គការសហប្រជាជាតិ បាននិយាយថា លោកខកចិត្តយ៉ាងខ្លាំងចំពោះការប្រឈមមុខដាក់គ្នា រវាងកងកម្លាំងសន្តិសុខអ៊ីស្រាអែល និងប៉ាឡេស្ទីន និងអាកប្បកិរិយារបស់ប៉ូលិសមួយចំនួន។

ចំណែកអ្នកនាំពាក្យសេតវិមាន លោកស្រី Jen Psaki ក៏បាននិយាយដែរថា រូបភាពរបស់ប៉ូលិស ដែលវាយអ្នកកាន់ទុក្ខគឺពិតជារន្ធត់ណាស់។ លោកស្រីថ្លែងថា “យើងសោកស្តាយចំពោះការចូលអន្តរាគមន៍ នៅក្នុងអ្វីដែលគួរតែជាការដង្ហែសពដោយសន្តិវិធី”៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ ការបាញ់សម្លាប់អ្នកកាសែត Al Jazeera ធ្វើឲ្យភេរវករផ្ទុះកំហឹងសងសឹក