រុស្ស៊ី គំរាមដាក់ទ័ពកាន់តែច្រើននៅតាមព្រំដែន ហ្វាំងឡង់ (មានវីដេអូ)

ទីក្រុងមូស្គូ នឹងពង្រឹងវត្តមានយោធារបស់ខ្លួននៅតាមព្រំដែនរុស្ស៊ី-ហ្វាំងឡង់ ក្នុងករណី រដ្ឋាភិបាលទីក្រុង ហែលស៊ិនគី ចូលរួមជាមួយអង្គការណាតូ ហើយសម្ព័ន្ធភាពនេះ ដាក់ពង្រាយសព្វាវុធវាយប្រហារលើទឹកដីរបស់ហ្វាំងឡង់។ នេះបើតាមការអះអាងកាលពីថ្ងៃអាទិត្យទី១៥ខែឧសភា ពីលោក Viktor Bondarev ប្រធានគណៈកម្មាធិការក្រុមប្រឹក្សាសហព័ន្ធស្តីពីការការពារ និងសន្តិសុខរុស្ស៊ី។

លោក Bondarev បាននិយាយនៅលើ Telegram ថា “យើងនឹងពង្រឹងព្រំដែន ដោយបង្កើនវត្តមានទាហានរុស្ស៊ីនៅតាមព្រំដែន ប្រសិនបើអាវុធវាយប្រហារនិងវាយលុករបស់ណាតូ ត្រូវបានដាក់ពង្រាយនៅក្នុងប្រទេសហ្វាំងឡង់ និងនៅតំបន់ជុំវិញយើង”។

គួរបញ្ជាក់ថា ប្រទេសហ្វាំងឡង់បានប្រកាសពីការសម្រេចចិត្តជាផ្លូវការ ក្នុងការចូលរួមជាមួយអង្គការណាតូកាលពីព្រឹកថ្ងៃអាទិត្យ។

ការសម្រេចចិត្តនឹងត្រូវបានពិភាក្សានៅក្នុងសភាហ្វាំងឡង់នៅថ្ងៃចន្ទនេះ ហើយការបោះឆ្នោតត្រូវបានគេរំពឹងថានឹងធ្វើឡើងនៅថ្ងៃអង្គារស្អែក។

ការសម្រេចចិត្តនេះត្រូវបានធ្វើតាមដោយប្រទេសស៊ុយអែត ដែលគេរំពឹងថា នឹងដាក់ពាក្យជាផ្លូវការសម្រាប់សមាជិកភាពណាតូរួមគ្នាជាមួយហ្វាំងឡង់៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Sputnik

ចុចអាន៖ ប្រទេសណាតូមួយ ចេញមុខមិនគាំទ្រការចូលជាសមាជិករបស់ ស៊ុយអែត និង ហ្វាំងឡង់