ចិន ធ្វើសមយុទ្ធយោធាជិតកោះតៃវ៉ាន់ ព្រមានទៅ អាមេរិក វិញ

បញ្ជាការដ្ឋានភាគខាងកើតរបស់កងទ័ពរំដោះប្រជាជនចិនបាននិយាយនៅថ្ងៃពុធនេះថា កងកម្លាំងប្រដាប់អាវុធចិនបានរៀបចំធ្វើសមយុទ្ធយោធានៅជិតកោះតៃវ៉ាន់ដើម្បីព្រមានទៅដល់សហរដ្ឋអាមេរិកវិញ ។

យោធាបាននិយាយនៅក្នុងសេចក្តីថ្លែងការណ៍មួយថា “ថ្មីៗនេះ កងទ័ពរំដោះប្រជាជនចិនបានរៀបចំការល្បាតត្រៀមប្រយុទ្ធរួមគ្នា និងសមយុទ្ធយោធានៅក្នុងសមុទ្រ និងលំហអាកាសជុំវិញកោះតៃវ៉ាន់ ហើយនេះគឺជាការព្រមានដ៏ធ្ងន់ធ្ងរមួយចំពោះសកម្មភាពថ្មីៗរវាងអាមេរិក និងតៃវ៉ាន់” ។

ក្នុងអំឡុងពេលដំណើរទស្សនកិច្ចរបស់លោក Joe Biden ទៅកាន់ប្រទេសជប៉ុនកាលពីថ្ងៃចន្ទ ប្រធានាធិបតីសហរដ្ឋអាមេរិករូបនេះបាននិយាយថា ទីក្រុងវ៉ាស៊ីនតោនបានត្រៀមខ្លួនរួចជាស្រេចក្នុងការចូលរួមផ្នែកយោធាដើម្បីការពារតៃវ៉ាន់ក្នុងករណីមានការឈ្លានពាន និងការប៉ុនប៉ងផ្លាស់ប្តូរស្ថានភាពជាឯកតោភាគី ។

ទន្ទឹមនោះ អ្នកនាំពាក្យក្រសួងការបរទេសចិនលោក Wang Wenbin បានឆ្លើយតបវិញថា ប្រទេសចិនបានជំរុញឲ្យសហរដ្ឋអាមេរិកប្រុងប្រយ័ត្ននូវអ្វីដែលប្រទេសនេះនិយាយទាក់ទងនឹងបញ្ហាតៃវ៉ាន់ ហើយបានជូនដំណឹងដល់ទីក្រុងវ៉ាស៊ីនតោនថា ទីក្រុងប៉េកាំងនឹងចាត់វិធានការខ្លាំងក្លាដើម្បីការពារអធិបតេយ្យភាព និងផលប្រយោជន៍សន្តិសុខរបស់ខ្លួន ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ប្រជាជនក្រុងតូក្យូប្រមូលផ្ដុំគ្នារិះគន់លោក Biden ថាមក ជប៉ុន ដើម្បីត្រៀម ខ្លួនធ្វើសង្គ្រាមលើ ចិន