មេទ័ពអង់គ្លេស ប្រាប់ទាហានឲ្យត្រៀមប្រយុទ្ធ និងផ្តួលកងទ័ពលោក ពូទីន ក្នុងសង្រ្គាមលោកលើកទី៣ (មានវីដេអូ)

មេបញ្ជាការកំពូលរបស់ចក្រភពអង់គ្លេស បានប្រាប់កងទ័ពរបស់លោក ឲ្យត្រៀមប្រយុទ្ធ និងផ្តួលកងទ័ពរបស់លោក ពូទីន ក្នុងសង្រ្គាមដីគោកនៅអឺរ៉ុប ដែលនឹងក្លាយជាសង្គ្រាមលោកលើកទី៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកមេទ័ព Sir Patrick Sanders ដែលទទួលបន្ទុកជាមេបញ្ជាការទូទៅ នៃកងទ័ពអង់គ្លេស បានព្រមានទាហាន ក្នុងសប្តាហ៍នេះថា “យើងកំពុងស្ថិតនៅក្នុងជំនាន់ ដែលត្រូវតែរៀបចំកងទ័ពដើម្បីប្រយុទ្ធនៅអឺរ៉ុបម្តងទៀត នៅពេលការលុកលុយរបស់រុស្ស៊ីលើអ៊ុយក្រែន បង្កធ្វើឲ្យរង្គោះរង្គើដល់ស្ថិរភាពពិភពលោក”។

នៅក្នុងសារយ៉ាងម៉ឺងម៉ាត់ទៅកាន់កងទ័ពអង់គ្លេស លោកបានសរសេរថា “ខ្ញុំជាអគ្គសេនាធិការដំបូងគេ ចាប់តាំងពីឆ្នាំ ១៩៤១មក ដែលគ្រប់គ្រងកងទ័ពនៅក្នុងស្រមោលនៃសង្រ្គាមដីគោកនៅអឺរ៉ុប ដែលពាក់ព័ន្ធនឹងមហាអំណាចទ្វីបមួយ។ ការគំរាមកំហែងយូរអង្វែងពីរុស្ស៊ីបង្ហាញថា យើងបានចូលយុគសម័យថ្មីនៃអសន្តិសុខហើយ”។

លោកបន្តថា “វាជាកាតព្វកិច្ចសំខាន់របស់ខ្ញុំ ក្នុងការធ្វើឲ្យកងទ័ពរបស់យើងមានភាពខ្លាំងក្លា និងមានប្រសិទ្ធភាពតាមដែលអាចធ្វើទៅបាន។ ឥឡូវនេះដល់ពេលហើយ ហើយយើងត្រូវចាប់យកឱកាស”។

ការអះអាងរបស់លោក កើតឡើងចំពេលលោក ពូទីន គំរាមកំហែងដល់ប្រទេសណាតូ ហើយសប្តាហ៍នេះ បានចំអកអតីតរដ្ឋសូវៀតនៅអឺរ៉ុបដោយប្រកាសថា “ពួកគេជាផ្នែកមួយនៃប្រទេសរុស្ស៊ីជាប្រវត្តិសាស្ត្រ”។

លោកពូទីន បានធ្វើអត្ថាធិប្បាយជាការឆ្លើយតបទៅនឹងសេចក្តីថ្លែងការណ៍ដ៏គួរឲ្យភ្ញាក់ផ្អើលមួយរបស់ប្រធានាធិបតីកាហ្សាក់ស្ថាន លោក Kassym-Jomart Tokaev ដែលបានប្រកាសថា គាត់មិនទទួលស្គាល់សាធារណរដ្ឋប្រជាមានិតដែលប្រកាសដោយខ្លួនឯងគឺ Donetsk និង Luhansk នៅភាគខាងកើតប្រទេសអ៊ុយក្រែន នោះទេ។

លោក Tokaev បានពណ៌នា សាធារណរដ្ឋ Donetsk និង សាធារណរដ្ឋ Luhansk ថាជា “ទឹកដីពាក់កណ្តាលរដ្ឋ”។ ប្រធានាធិបតី​កាហ្សាក់ស្ថាន​រូបនេះ​និយាយ​ថា “យើង​មិន​ទទួល​ស្គាល់​តៃវ៉ាន់ កូសូវ៉ូ អូសេទី​ខាង​ត្បូង ឬ​អាប់ខាហ្សី ​ទេ។ យើង​អនុវត្ត​គោលការណ៍​នេះ​ចំពោះ​ដែនដី​រដ្ឋ​មួយ ​គឺ​សាធារណរដ្ឋ​ប្រជាជន Luhansk និង Donetsk”៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ រុស្ស៊ី វាយចូលទីក្រុងសំខាន់នៅភាគខាងកើត អ៊ុយក្រែន ដោយជោគជ័យ