ព័ត៌មានអន្ដរជាតិ

អាមេរិក នឹងប្រើកម្លាំងយោធាជា “មធ្យោបាយចុងក្រោយ” រារាំងមហិច្ឆតា នុយក្លេអ៊ែររបស់ អ៊ីរ៉ង់

បានផុស

៤ years មុន

នៅ

ថ្ងៃព្រហស្បតិ៍ ១៤ កក្កដា ២០២២

ដោយ

ប្រធានាធិបតីអាមេរិកលោក ចូ បៃដិន បានបង្ហាញចេតនាប្រើប្រាស់កម្លាំងយោធាជាមធ្យោបាយចុងក្រោយ ដើម្បីរារាំងអ៊ីរ៉ង់មិនឲ្យមានអាវុធនុយក្លេអ៊ែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក បៃដិន បាននិយាយនៅក្នុងបទសម្ភាសន៍មួយជាមួយទូរទស្សន៍អ៊ីស្រាអែលកាលពីថ្ងៃពុធថា វាគឺជា “កំហុសដ៏មហិមាមួយ” សម្រាប់អតីតប្រធានាធិបតី ដូណាល់ ត្រាំ ក្នុងការដកខ្លួនចេញពីកិច្ចព្រមព្រៀងនុយក្លេអ៊ែរ ឆ្នាំ ២០១៥ ស្របពេលដែលអ៊ីរ៉ង់ខិតជិតទទួលបានអាវុធនុយក្លេអ៊ែរច្រើនជាងកាលពីមុនទៅទៀត ។

ទន្ទឹមនោះ អ្នកសម្ភាសន៍ក៏បានលើកឡើងពីការអត្ថាធិប្បាយកន្លងមករបស់លោក បៃដិន ផងដែរដែលថា លោកនឹងធ្វើអ្វីគ្រប់យ៉ាងដើម្បីធានាថា អ៊ីរ៉ង់នឹងមិនទទួលបានអាវុធនុយក្លេអ៊ែរ ហើយនៅពេលសួរថាតើការអត្ថាធិប្បាយនេះមានន័យថា រដ្ឋបាលរបស់លោកនឹងប្រើប្រាស់កម្លាំងប្រឆាំងនឹងអ៊ីរ៉ង់ឬយ៉ាងណា, លោក បៃដិន បានឆ្លើយថា “មែនហើយ ប្រសិនបើរឿងនោះកើតឡើង នេះជាជម្រើសចុងក្រោយរបស់យើង” ។

លោក បៃដិន បានកត់សម្គាល់ថា មនុស្សមួយចំនួនគិតថា សហរដ្ឋអាមេរិកបានដើរចេញពីមជ្ឈិមបូព៌ាក្រោមការគ្រប់គ្រងរបស់រដ្ឋាបាលចុងក្រោយរបស់លោក ត្រាំ ហើយវានឹងបង្កើតភាពខ្វះចន្លោះដែលចិន និងរុស្ស៊ីនឹងបំពេញ ប៉ុន្តែយើងមិនអាចឲ្យរឿងនោះកើតឡើងបានទេ ។

គួរបញ្ជាក់ថា ប្រធានាធិបតីអាមេរិកលោក ចូ បៃដិន បានបំពេញទស្សនកិច្ចនៅមជ្ឈិមបូព៌ាជាលើកដំបូង ចាប់តាំងពីឡើងកាន់តំណែង ខណៈលោកនឹងបង្កើតភាពជាដៃគូថ្មីក្នុងចំណោមសម្ព័ន្ធមិត្តក្នុងតំបន់ និងកាត់បន្ថយផលប៉ះពាល់ពីសង្គ្រាមលុកលុយរបស់រុស្ស៊ីលើការផ្គត់ផ្គង់ស្បៀងអាហារ និងប្រេងឥន្ធនៈជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ រដ្ឋមួយ របស់ អាមេរិក ប្រកាសអាសន្ន ដោយសារទឹកជំនន់