ព័ត៌មានអន្ដរជាតិ

មីយ៉ាន់ម៉ា ប្រហារជីវិតមនុស្សលើកដំបូង ក្នុងរយៈពេលជាង ៤ទសវត្សរ៍

បានផុស

២ years មុន

នៅ

ថ្ងៃចន្ទ ២៥ កក្កដា ២០២២

ដោយ

នៅថ្ងៃចន្ទ ទី ២៥ ខែកក្កដានេះ អាជ្ញាធរយោធារបស់ប្រទេសមីយ៉ាន់ម៉ា បានប្រហារជីវិតសកម្មជនប្រជាធិបតេយ្យចំនួន៤នាក់ ដែលរងការចោទប្រកាន់ថា បានជួយអនុវត្ត “អំពើភេរវកម្ម” ហើយនេះ គឺជាការប្រហារជីវិតលើកដំបូងរបស់ប្រទេសអាស៊ីអាគ្នេយ៍មួយនេះ ក្នុងរយៈពេលជាង ៤ទសវត្សរ៍ចុងក្រោយ។

នៅក្នុងការកាត់ក្តីបិទទ្វារកាលពីខែមករា បុរសទាំងបួននាក់ ត្រូវបានចោទប្រកាន់ថា បានជួយកងជីវពលក្នុងការប្រយុទ្ធប្រឆាំងនឹងកងទ័ព ដែលបានដណ្តើមអំណាចនៅក្នុងរដ្ឋប្រហារកាលពីឆ្នាំមុន។

រដ្ឋាភិបាលរួបរួមជាតិមីយ៉ាន់ម៉ា (NUG) ដែលជារដ្ឋបាលស្រមោលហាមឃាត់ដោយយោធាកំពុងកាន់អំណាច បានចេញមុខថ្កោលទោសការប្រហារជីវិតនេះ។

អ្នកនាំពាក្យការិយាល័យប្រធាន NUG លោក Kyaw Zaw បានប្រាប់រ៉យទ័រថា “គួរឲ្យសោកស្ដាយ យើងសូមថ្កោលទោសយ៉ាងដាច់អហង្ការចំពោះអំពើឃោរឃៅរបស់យោធា។ សហគមន៍ពិភពលោក ត្រូវតែដាក់ទណ្ឌកម្មលើភាពឃោរឃៅរបស់ពួកគេ”។

កាសែត Global New Light of Myanmar បានចុះផ្សាយថា ក្នុងចំណោមអ្នកដែលត្រូវបានប្រហារជីវិតនោះ មានឥស្សរជនប្រជាធិបតេយ្យ Kyaw Min Yu ដែលត្រូវបានគេស្គាល់ថា Jimmy និងអតីតសមាជិកសភា និងជាសិល្បករហ៊ីបហប Phyo Zeya Thaw។

Kyaw Min Yu អាយុ ៥៣ ឆ្នាំ និង Phyo Zeya Thaw អាយុ ៤១ ឆ្នាំ ដែលជាសម្ព័ន្ធមិត្តរបស់អតីតមេដឹកនាំមីយ៉ាន់ម៉ាលោកស្រី Aung San Suu Kyi បានចាញ់បណ្តឹងឧទ្ធរណ៍ប្រឆាំងនឹងការកាត់ទោសកាលពីខែមិថុនា។ មនុស្សពីរនាក់ទៀតដែលត្រូវប្រហារជីវិតគឺ Hla Myo Aung និង Aung Thura Zaw។

កាសែតដដែលផ្សាយថា អ្នកទាំង៤ ត្រូវបានចោទប្រកាន់ក្រោមច្បាប់ប្រឆាំងភេរវកម្ម និងក្រមព្រហ្មទណ្ឌ ហើយការផ្តន្ទាទោសត្រូវបានអនុវត្តតាមនីតិវិធីពន្ធនាគារ។ ការប្រហារជីវិតនៅមីយ៉ាន់ម៉ាកន្លងមកគឺដោយ ការព្យួរក។