ម៉ុលដាវី កំពុងភ័យខ្លាំងថា រុស្ស៊ី នឹងលុកលុយខ្លួន បន្ទាប់ពី អ៊ុយក្រែន (មានវីដេអូ)

នាយករដ្ឋមន្ត្រី ម៉ុលដាវី បាននិយាយថា លោកស្រីព្រួយបារម្ភយ៉ាងខ្លាំងថា រុស្ស៊ីនឹងលុកលុយប្រទេសរបស់លោកស្រីនៅពេលក្រោយ ហើយព្រមានថា គ្មានប្រទេសណាមានសុវត្ថិភាពពីលោក វ្ល៉ាឌីមៀរ ពូទីន ទេ។

ការព្រមានរបស់លោកស្រី Natalia Gavrilita បានកើតឡើង បន្ទាប់ពីកងកម្លាំងរបស់ទីក្រុងមូស្គូ បានសម្រុកចូលភាគខាងត្បូង និងខាងកើតប្រទេសអ៊ុយក្រែន នៅជិតព្រំដែនម៉ុលដាវី-អ៊ុយក្រែន ក្នុងរយៈពេលប៉ុន្មានខែថ្មីៗនេះ។

លោកស្រីនិយាយថា “ពួកយើងមានក្តីព្រួយបារម្ភយ៉ាងខ្លាំង ជាពិសេសការដែលដឹងថា កងទ័ពស្ថិតនៅលើទឹកដីនៃតំបន់ផ្តាច់ខ្លួន Transnistria។ យើង​កំពុង​ធ្វើ​គ្រប់​យ៉ាង តាម​ដែល​អាច​ធ្វើ​ទៅ​បាន ​ដើម្បី​រក្សា​សន្តិភាព និង​ស្ថិរភាព និង​ដើម្បី​ធានា​ថា​ ការ​ប្រយុទ្ធ​គ្នា នឹង​មិនរីកកាន់តែធំឡើយ”។

ដោយមានប្រជាជនត្រឹមតែ២.៥លាននាក់, ម៉ុលដាវី គឺជាប្រទេសតូចមួយ ជាពិសេសបើប្រៀបធៀបទៅនឹងអ្នកជិតខាងគឺអ៊ុយក្រែន ដែលមានប្រជាជនជាង ៤០ លាននាក់ មុនការលុកលុយរបស់លោក ពូទីន បានចាប់ផ្តើមនៅថ្ងៃទី២៤ខែកុម្ភៈ។

ទំហំផ្ទៃដី និងចំនួនប្រជាជនដ៏ច្រើនរបស់អ៊ុយក្រែន អាចឲ្យខ្លួនទប់ទល់យ៉ាងខ្លាំងក្លា ប្រឆាំងនឹងការវាយលុករបស់រុស្ស៊ី ដែលធ្វើឲ្យមនុស្សជាច្រើនភ្ញាក់ផ្អើល។

ដូចច្នេះហើយ ប្រទេសមួយដូចជា ម៉ុលដាវី ដែលមានអព្យាក្រិត្យរដ្ឋធម្មនុញ្ញ និងមិនមែនជាសមាជិកណាតូនោះ គឺពិតជាពិបាកបំផុត ក្នុងការការពារខ្លួន។

ម៉ុលដាវី គឺជាផ្នែកមួយនៃសហភាពសូវៀតរហូតដល់ឆ្នាំ ១៩៩១ នៅពេល ខ្លួនបានបំបែកចេញពីប្លុកកុម្មុយនិស្តដែលត្រូវបានរំលាយ។

តាំង​ពី​សង្គ្រាម​នៅ​អ៊ុយក្រែន​​ចាប់​ផ្តើម​មក ម៉ុលដាវី ​បាន​ផ្តល់​ជម្រក​ដល់​ជន​ភៀស​ខ្លួន​អ៊ុយក្រែន​ប្រហែល​កន្លះ​លាន​នាក់។

ការភ័យខ្លាចថា រុស្សីអាចធ្វើប្រតិបត្តិការហួសពីអ៊ុយក្រែន ត្រូវបានលើកឡើងក្នុងខែមីនា នៅពេលដែលសម្ព័ន្ធមិត្តលោកពូទីន និងប្រធានាធិបតីបេឡារុសលោក Alexander Lukashenko បានបង្ហាញនៅក្នុងរូបថតផែនទីសមរភូមិលេចធ្លាយមួយ ដោយចង្អុលដាក់ប្រទេសម៉ុលដាវី៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ រុស្ស៊ីប្រាប់ថា ប្រជាជនម៉ុលដាវី គួរតែព្រួយបារម្ភអំពីអនាគតរបស់ពួកគេ