សមយុទ្ធ អាមេរិក-ជប៉ុន នៅជិតព្រំដែន រុស្ស៊ី កំពុងគំរាមកំហែងសន្តិសុខ ក្រុងមូស្គូ

អនុរដ្ឋមន្ត្រីការបរទេសរុស្ស៊ីលោក Igor Morgulov បាននិយាយនៅក្នុងបទសម្ភាសន៍ជាមួយទីភ្នាក់ងារសារព័ត៌មានរដ្ឋ RIA របស់រុស្ស៊ីកាលពីថ្ងៃអង្គារថា សមយុទ្ធរវាងកងកម្លាំងស្វ័យការពារជប៉ុន និងយោធាអាមេរិកនៅជិតព្រំដែនរុស្ស៊ីគឺជាការគំរាមកំហែងដល់សន្តិសុខរុស្ស៊ី ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការកត់សម្គាល់នេះក៏ហាក់ដូចជាសំដៅទៅលើសមយុទ្ធរួមគ្នាដែលធ្វើឡើងដោយកងកម្លាំងស្វ័យការពារដែនសមុទ្ររបស់ប្រទេសជប៉ុន និងកងទ័ពជើងទឹកសហរដ្ឋអាមេរិកនៅសមុទ្រជប៉ុនកាលពីដើមខែនេះ ។

ក្នុងសមយុទ្ធនោះ កងកម្លាំងវាយប្រហាររបស់សហរដ្ឋអាមេរិកដែលដឹកនាំដោយនាវាផ្ទុកយន្តហោះដើរដោយថាមពលនុយក្លេអ៊ែរ USS Abraham Lincoln ក៏បានចូលរួមក្នុងសមយុទ្ធនេះផងដែរ ។

លោក Morgulov បាននិយាយថា រុស្ស៊ីកំពុងព្រមានតាមរយៈបណ្តាញការទូតដល់ជប៉ុនឲ្យត្រៀមខ្លួនទប់ទល់នឹងវិធានការតបតរបស់រុស្ស៊ី ប្រសិនបើជប៉ុនធ្វើសមយុទ្ធបែបនេះញឹកញាប់ជាងនេះ ។

ទន្ទឹមនោះ រុស្ស៊ីក៏បានចាត់ទុកប្រទេសជប៉ុនជារដ្ឋ “មិនមែនសម្ព័ន្ធមិត្ត” ផងដែរ ចាប់តាំងពីជប៉ុនបានចូលរួមជាមួយបណ្តាប្រទេសលោកខាងលិចផ្សេងទៀតក្នុងការដាក់ទណ្ឌកម្មលើរុស្ស៊ីសម្រាប់ការលុកលុយអ៊ុយក្រែន ។

ស្របពេលជាមួយគ្នានេះ រុស្ស៊ីក៏បានប្រកាសជាឯកតោភាគីថា ខ្លួនកំពុងផ្អាកកិច្ចពិភាក្សាសន្ធិសញ្ញាសន្តិភាពទ្វេភាគីជាមួយជប៉ុនផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ អង់គ្លេស ឲ្យ រុស្ស៊ី ចាត់ទុកទាហានស៊ីឈ្នួលដែលចាប់ធ្វើឈ្លើយសឹក ជាយោធា អ៊ុយក្រែន ក្រោមច្បាប់មនុស្សធម៌