ព័ត៌មានអន្ដរជាតិ

បេសកជន UN ឲ្យ មីយ៉ាន់ម៉ា បញ្ឈប់ការប្រហារជីវិត និងអំពើហិង្សាគ្រប់ទម្រង់ទាំងអស់

បានផុស

៣ years មុន

នៅ

ថ្ងៃព្រហស្បតិ៍ ១៨ សីហា ២០២២

ដោយ

បេសកជនពិសេសរបស់អង្គការសហប្រជាជាតិ (UN) ទទួលបន្ទុកសម្រាប់ប្រទេសមីយ៉ាន់ម៉ាបានអំពាវនាវឲ្យបញ្ឈប់ជាបន្ទាន់នូវអំពើហិង្សាគ្រប់ទម្រង់ ជាពិសេសការប្រហារជីវិត គោរពពេញលេញចំពោះសិទ្ធិមនុស្ស និងនីតិរដ្ឋ ក៏ដូចជាដោះលែងអ្នកជាប់ឃុំទាំងអស់ផងដែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងជំនួបជាមួយលោក Min Aung Hlaing នៅរដ្ឋធានី Naypyitaw របស់ប្រទេសមីយ៉ាន់ម៉ាកាលពីថ្ងៃពុធ, លោកស្រី Noeleen Heyzer ក៏បានស្នើសុំជួបអតីតមេដឹកនាំលោកស្រី អ៊ុងសាន ស៊ូជី ដែលកំពុងជាប់ឃុំផងដែរ ប៉ុន្តែត្រូវបានមេដឹកនាំរដ្ឋប្រហាររូបនេះបដិសេធ ។

ទន្ទឹមនោះ ក្នុងដំណើរទស្សនកិច្ចលើកដំបូងទៅកាន់ប្រទេសដែលហែកហួរដោយជម្លោះមួយនេះលោកស្រី Heyzer ក៏បានសង្កត់ធ្ងន់ដែរថា “ដំណើរទស្សនកិច្ចរបស់លោកស្រីគឺដើម្បីបង្ហាញពីកង្វល់របស់អង្គការសហប្រជាជាតិ ហើយការចូលរួមរបស់ UN មិនផ្តល់ភាពស្របច្បាប់ណាមួយឡើយ” ។

គួររំឭកថា យោធាមីយ៉ាន់ម៉ាបានដណ្តើមយកអំណាចកាលពីខែកុម្ភៈ ឆ្នាំ ២០២១ ពោលប៉ុន្មានម៉ោងប៉ុណ្ណោះ មុនពេលសភាថ្មីរបស់ប្រទេសនេះប្រកាសទទួលស្គាល់រដ្ឋាភិបាលរបស់លោកស្រី អ៊ុងសាន ស៊ូជី ដោយក្រុមយោធាបានចាប់ឃុំខ្លួនមេដឹកនាំជាប់ឆ្នោតរូបនេះ រួមជាមួយនឹងសមាជិកនៃរដ្ឋាភិបាលស៊ីវិលរបស់លោកស្រីផងដែរ ។

ចាប់តាំងពីពេលនោះមក លោកស្រី អ៊ុងសាន ស៊ូជី ត្រូវបានកាត់ទោស និងដាក់ពន្ធនាគារ ក្រោមបទចោទប្រកាន់មួយចំនួន ហើយនៅតែប្រឈមមុខនឹងការកាត់ទោសជាច្រើនទៀត ខណៈដែលសកម្មជនប្រឆាំងរដ្ឋប្រហាររាប់ពាន់នាក់ក៏ត្រូវបានចាប់ខ្លួនផងដែរ ។

បន្ថែមពីនេះកាលពីចុងខែមុន យោធាក៏បានប្រហារជីវិតសកម្មជននយោបាយ ៤ នាក់ផងដែរ ដែលជាការអនុវត្តទោសប្រហារជីវិតលើកដំបូងរបស់មីយ៉ាន់ម៉ាក្នុងរយៈពេលជាង ៣០ ឆ្នាំ ហើយក្នុងចំណោមអ្នកស្លាប់នោះរួមមានទាំងលោក Phyo Zeya Thaw ដែលជាអតីតសមាជិកសភាមកពីគណបក្សសម្ព័ន្ធជាតិដើម្បីប្រជាធិបតេយ្យ (NLD) របស់លោកស្រី អ៊ុងសាន ស៊ូជី ៕

ប្រែសម្រួលដោយ ៖ ជីវ័ន្ត

ប្រភព ៖ NHK / Al Jazeera

ចុចអាន ៖ មកដឹងសព្វាវុធដែល រុស្ស៊ី ធ្លាប់ផ្ដល់ឲ្យ មីយ៉ាន់ម៉ា