មន្ត្រីអាមេរិកមួយរូបទៀត ធ្វើទស្សនកិច្ច តៃវ៉ាន់ ខណៈមានភាពតានតឹងជាមួយ​ ចិន

អភិបាលរដ្ឋ Indiana បានទៅដល់ទីក្រុងតៃប៉ិ កាលពីថ្ងៃអាទិត្យទី២១ ខែសីហា ដោយលោកបានក្លាយជាមន្ត្រីចុងក្រោយបង្អស់របស់សហរដ្ឋអាមេរិក ដែលទៅបំពេញទស្សនកិច្ចនៅកោះតៃវ៉ាន់ ផ្គើននឹងសម្ពាធពីប្រទេសចិន ដែលមិនអនុញ្ញាតឲ្យការធ្វើដំណើរបែបនេះកើតឡើង។

ប្រទេសចិន បាននិងកំពុងធ្វើសមយុទ្ធនៅជិតកោះតៃវ៉ាន់ ចាប់តាំងពីប្រធានសភាអាមេរិក លោកស្រី Nancy Pelosi ធ្វើទស្សនកិច្ចរយៈពេលពីរថ្ងៃនៅទីក្រុង តៃប៉ិ កាលពីដើមខែនេះ។

កាល​ពី​សប្តាហ៍​មុន ក្រុមទី២ នៃ​សមាជិក​សភា​អាមេរិក ក៏​បាន​ធ្វើ​ទស្សនកិច្ចនៅ​កោះ​តៃវ៉ាន់ ផងដែរ។

អភិបាលរដ្ឋ Indiana លោក Eric Holcomb បានបង្ហោះ Twitter ថា លោកក៏នឹងទៅបំពេញទស្សនកិច្ចនៅប្រទេសកូរ៉េខាងត្បូងផងដែរ ខណៈការិយាល័យប្រធានាធិបតីតៃវ៉ាន់ និយាយថា លោកបានជួបជាមួយលោកស្រីប្រធានាធិបតី Tsai Ing-wen នៅព្រឹកថ្ងៃចន្ទនេះ។

លោក Holcomb សរសេរថា “ខ្ញុំមានថាមពល ក្នុងការចំណាយពេលនៅសប្តាហ៍នេះ ដើម្បីកសាងទំនាក់ទំនងថ្មី ពង្រឹងទំនាក់ទំនងយូរអង្វែង និងការពង្រីកភាពជាដៃគូក្នុងវិស័យសំខាន់ៗជាមួយតៃវ៉ាន់ និងកូរ៉េខាងត្បូង”។

គួរបញ្ជាក់ថា លោក Holcomb គឺជាអភិបាលរដ្ឋរបស់សហរដ្ឋអាមេរិកដំបូងគេ ដែលទៅបំពេញទស្សនកិច្ចកោះតៃវ៉ាន់ ចាប់តាំងពីជំងឺរាតត្បាតកូវីដ១៩ ផ្ទុះឡើងកាលពីជាងពីរឆ្នាំមុន។

ទោះបីជាយ៉ាងណាក៏ដោយ ភ្លាមៗនេះ មិនទាន់មានការឆ្លើយតបពីប្រទេសចិនចំពោះការមកដល់របស់គាត់នោះទេ៕

ប្រែសម្រួល៖ Vann Vann

ប្រភព៖ CNA

ចុចអាន៖ គណៈប្រតិភូសភាអាមេរិកមួយក្រុមទៀត ទៅដល់ កោះតៃវ៉ាន់ (មានវីដេអូ)