ព័ត៌មានអន្ដរជាតិ

ថៃ ឲ្យពលរដ្ឋរស់នៅតាមបណ្ដោយទន្លេមេគង្គប្រុងប្រយ័ត្ន កម្ពស់ទឹកកំពុងហក់ឡើងខ្លាំង

បានផុស

៤ years មុន

នៅ

ថ្ងៃសុក្រ ២ កញ្ញា ២០២២

ដោយ

អាជ្ញាធរប្រទេសថៃបានព្រមានប្រជាពលរដ្ឋនៅស្រុកចំនួន ៤ ដែលរស់នៅតាមបណ្តោយដងទន្លេមេគង្គ និងដៃទន្លេឲ្យមានការប្រុងប្រយ័ត្ន ដោយសារតែកម្ពស់ទឹកបានហក់ឡើងដល់ជិត ៩ ម៉ែត្រ ហើយអាចនឹងហូរហៀរច្រាំងទន្លេនាពេលឆាប់ៗខាងមុខនេះ ។

ការិយាល័យបង្ការ និងកាត់បន្ថយគ្រោះមហន្តរាយខេត្ត Nakhon Phanom កាលពីថ្ងៃព្រហស្បតិ៍បានព្រមានប្រជាជនដែលរស់នៅក្នុងតំបន់ហានិភ័យ និងតំបន់សេដ្ឋកិច្ចក្នុងស្រុក Ban Phaeng, Tha Uthen, Muang និង That Phanom នៅតាមបណ្តោយច្រាំងទន្លេមេគង្គ ត្រៀមខ្លួនទប់ទល់នឹងការជន់លិចដែលអាចបណ្តាលមកពីទឹកជំនន់ ហើយប្រជាជនក៏ត្រូវបានប្រាប់ឲ្យរើរបស់របរពួកគេទៅកាន់ទីទួលខ្ពស់ ប្រសិនបើភ្លៀងនៅតែបន្តធ្លាក់ខ្លាំងបែបនេះ ។

កម្រិតទឹកទន្លេមេគង្គក្នុងខេត្ត Nakhon Phanom កាលពីថ្ងៃព្រហស្បតិ៍ បានហក់ឡើងកម្ពស់ ៨.៥០ ម៉ែត្រ ឬ ៣.៥ ម៉ែត្រ ក្រោមកម្រិតកម្ពស់ទឹក ១២ ម៉ែត្រដែលខ្ពស់បំផុត ។

ទន្ទឹមនោះ ដៃទន្លេធំៗចំនួន ៣ គឺ Nam Oun Nam Songkhram និង Nam Kam ឥឡូវនេះមានកម្រិតទឹកពី ៨០ ភាគរយទៅ ៩០ ភាគរយទៅហើយ ខណៈតំបន់លំនៅឋាន និងកសិកម្មទាបមួយចំនួនក្នុងខេត្តភាគឦសានទាំងនេះក៏បានរងការប៉ះពាល់រួចទៅហើយ ដោយសារតែទឹកជន់លិច ។

ស្របពេលជាមួយគ្នានេះ មន្ទីរខេត្ត Nakhon Phanom ក៏កំពុងសហការជាមួយអាជ្ញាធរស្រុក និងរដ្ឋបាលមូលដ្ឋានរៀបចំម៉ាស៊ីនបូមទឹកនៅតំបន់ដែលមានហានិភ័យ ដើម្បីការពារទឹកជំនន់ដែលអាចអូសបន្លាយពេលយូរផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Bangkok Post

ចុចអាន ៖ អ្នកជំនាញព្រមានថា ទីក្រុងបាងកក ប្រឈមគ្រោះទឹកជំនន់ដ៏ធំដូចកាល ១០ ឆ្នាំមុន