លោក គីម ជុងអ៊ុន បង្ហើបថា កូរ៉េខាងជើង អាចចាប់ផ្តើមយុទ្ធនាការ ចាក់វ៉ាក់សាំងកូវីដ

មេដឹកនាំកូរ៉េខាងជើង លោក គីម ជុងអ៊ុន បានឲ្យដឹងថា ប្រទេសរបស់លោក អាចចាប់ផ្តើមយុទ្ធនាការចាក់វ៉ាក់សាំងបង្ការជំងឺកូវីដ១៩នៅក្នុងខែវិច្ឆិកា។

នៅក្នុងសុន្ទរកថាកាលពីថ្ងៃព្រហស្បតិ៍ទី០៨ខែកញ្ញា ទៅកាន់សភាជាតិកូរ៉េខាងជើង លោក គីម បានលើកឡើងពីការព្រមានរបស់អង្គការសុខភាពពិភពលោក (WHO) ដែលថា រដូវរងាអាចនឹងមានការផ្ទុះឡើងនៃករណីឆ្លងវីរុសនេះ។

លោក​បាន​ថ្លែង​ដោយ​មិន​បញ្ជាក់​លម្អិត​ថា “​ដូច្នេះ រួម​ជាមួយ​នឹង​ការ​ចាក់​ថ្នាំ​បង្ការ​ដោយទំនួល​ខុស​ត្រូវ យើង​គួរ​តែ​ណែនាំ​ឲ្យប្រជាពលរដ្ឋ​ទាំងអស់ ​ពាក់​ម៉ាស​ដើម្បី​ការពារ​សុខភាព​របស់​ពួកគេ​ចាប់ពី​ខែ​វិច្ឆិកា​ទៅ​”។

កូរ៉េខាងជើង ​មិន​បាន​បញ្ជាក់​ពី​ការចាក់ថ្នាំ​បង្ការ​ជំងឺ​កូវីដ-១៩​ទេ ថ្វីបើ​កំណត់ត្រា​គយ​បង្ហាញ​ថា ខ្លួន​បាន​នាំ​ចូល​វ៉ាក់សាំង​​ពី​ប្រទេស​ចិន​ក្នុង​ឆ្នាំ​នេះក៏ដោយ។

កាលពីខែមុន លោក គីម បានប្រកាសជ័យជម្នះលើជំងឺកូវីដ១៩ និងបញ្ជាឲ្យដកវិធានការប្រឆាំងការរាតត្បាតជាអតិបរមា ដែលបានដាក់ក្នុងខែឧសភា។

កូរ៉េខាងជើង ​មិន​ដែល​បញ្ជាក់ពិតប្រាកដ​ថា ​មាន​មនុស្ស​ប៉ុន្មាន​នាក់​​បានឆ្លងជំងឺ​កូវីដ-១៩​ទេ​ដោយសារ​ប្រទេស​នេះ​ខ្វះ​មធ្យោបាយ​ធ្វើ​តេស្ដ​។

ផ្ទុយទៅវិញ កូរ៉េខាងជើងបានរាយការណ៍ពីចំនួនអ្នកជំងឺគ្រុនក្តៅប្រចាំថ្ងៃ ដែលបានកើនឡើងដល់ប្រហែល ៤.៧៧លាននាក់ ក្នុងចំណោមប្រជាជនប្រហែល ២៥ លាននាក់។ ប៉ុន្តែខ្លួនមិនបានចុះបញ្ជីករណីបែបនេះថ្មីទេ ចាប់តាំងពីថ្ងៃទី ២៩ ខែកក្កដាមក ហើយនិយាយថា អ្នកស្លាប់មានចំនួន៧៤នាក់៕

ប្រែសម្រួល៖ Vann Vann

ប្រភព៖ CNA

ចុចអាន៖ កូរ៉េខាងជើង ប្រកាសយកឈ្នះលើកូវីដ ទោះលោក គីម ចេញរោគសញ្ញាគ្រុនក្តៅ