អង់គ្លេសប្រមែប្រមូលគ្រូពេទ្យនិងអ្នកស្ម័គ្រចិត្ត១ម៉ឺននាក់ ជួយដល់ប្រតិបត្តិការចាក់វ៉ាក់សាំងកូវីដ

គ្រូពេទ្យនិងអ្នកស្ម័គ្រចិត្តចំនួន១០,០០០នាក់កំពុងត្រៀមខ្លួន ជួយដល់ប្រតិបត្តិការចាក់វ៉ាក់សាំងការពារជំងឺកូវីដ១៩ទី២របស់ចក្រភពអង់គ្លេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

និយតករអាចអនុម័តវ៉ាក់សាំងរបស់ Oxford / AstraZeneca នៅថ្ងៃអង្គារនេះខណៈវិមាន Downing Street បានទិញថ្នាំបង្ការចំនួន១០០លានដូសរួចទៅហើយ។

វាបានកើតឡើងបន្ទាប់ពីមេក្រុមហ៊ុនឱសថអង់គ្លេស-ស៊ុយអ៊ែតមួយនេះបានអះអាងពីក្តីសង្ឃឹមថា វាមានប្រសិទ្ធភាពជាងការគិតទុកស្របពេលមានការរីករាលដាលយ៉ាងឆាប់រហ័សនៃវីរុសកូរ៉ូណាក្លាយពូជប្រភេទថ្មី។

ប្រជាជនរាប់លាននាក់នៅទូទាំងប្រទេសអង់គ្លេសត្រូវបានគេព្រមានថា ពួកគេអាចត្រូវបានគេដាក់ចូលក្នុងវិធានការរឹតត្បិតថ្នាក់ទី៤ក្នុងគោលបំណងគ្រប់គ្រងវីរុសក្លាយពូជប្រភេទថ្មីនេះ។

មុនថ្ងៃណូអែល មន្ទីរសុខាភិបាលនិងសេវាថែទាំសង្គមបាននិយាយថា មនុស្សជាង៦០០,០០០នាក់បានទទួលវ៉ាក់សាំងដំបូងបង្អស់របស់ក្រុមហ៊ុន Pfizer / BioNTech។

ប៉ុន្តែជាមួយនឹងការឆ្លងថ្មីជាមធ្យមជាង៣០,០០០នាក់ក្នុងមួយថ្ងៃនៅចក្រភពអង់គ្លេស, ការចាក់វ៉ាក់សាំងរបស់ Oxford ត្រូវបានគេចាត់ទុកថាមានសារៈសំខាន់មួយផ្នែកពីព្រោះវាមិនដូចថ្នាំបង្ការរបស់ Pfizer ទេពោលគឺវាមិនចាំបាច់ត្រូវរក្សាទុកនៅសីតុណ្ហភាព -៧០អង្សារសេឡើយ។

ប្រភពមួយបានប្រាប់សារព័ត៌មាន Daily Telegraph ថា “អ្នកចាក់វ៉ាក់សាំងនិងបុគ្គលិកគាំទ្ររាប់ម៉ឺននាក់ត្រូវបានប្រមែប្រមូល។ នៅពេលនេះ យើងកំពុងធ្វើប្រតិបត្តិការគ្រប់យ៉ាងសម្រាប់ថ្ងៃទី៤ខែមករាក្នុងការចាក់វ៉ាក់សាំងរបស់ Oxford / AstraZeneca ជាលើកដំបូង”៕

ប្រែសម្រួលដោយ៖ Vann Vann

ប្រភព៖ Mirror

ចុចអាន៖ កូវីដផង កូរ៉ូណាក្លាយពូជផង ពេលនេះអង់គ្លេសជួបគ្រោះទឹកជំនន់ធ្ងន់ធ្ងរទៀត

ចុចអាន៖ ជិតដល់ថ្ងៃចាក់វ៉ាក់សាំង បែរជាអង់គ្លេសប្រកាសថា មនុស្សអាយុលើស៨០ឆ្នាំភាគច្រើននឹងត្រូវរង់ចាំដល់ឆ្នាំក្រោយ