អ៊ុយក្រែន បើកការវាយប្រហារចូលទឹកដីរុស្ស៊ី បណ្តាលឲ្យមានមនុស្សស្លាប់ (មានវីដេអូ)

អភិបាលតំបន់ Belgorod លោក Vyacheslav Gladkov បាននិយាយទាំងយប់អាធ្រាត្រឈានចូលថ្ងៃសុក្រទី១៦ខែកញ្ញាថា ជនស៊ីវិលម្នាក់បានស្លាប់ និងពីរនាក់រងរបួសនៅក្នុងទីប្រជុំជន Valuyki ដោយសារតែការវាយប្រហារកាំភ្លើងធំ របស់អ៊ុយក្រែន។

កាំជ្រួច​ដែល​អាចបុកទម្លុះ​ប្រព័ន្ធ​ការពារ​ដែនអាកាស​រុស្ស៊ី​ ក៏បាន​បំផ្លាញ​យានជំនិះ​ចំនួន ៣ គ្រឿង និង​ឆាប​ឆេះ​ផ្ទះ​ឯកជន ៨ ខ្នងផងដែរ។

Valuyki គឺជាទីប្រជុំជនមួយដែលមានប្រជាជនប្រហែល ៣៥០០០នាក់ ស្ថិតនៅចម្ងាយ១៥០គីឡូម៉ែត្រភាគខាងកើតទីក្រុង Belgorod និងមានចម្ងាយ១៥គីឡូម៉ែត្រ ភាគខាងជើងនៃព្រំដែនជាមួយអ៊ុយក្រែន។

ការវាយប្រហារនេះកើតឡើង បន្ទាប់ពីទាហានរុស្ស៊ី បានដកថយចេញពីភាគឦសាននៃតំបន់ Kharkov កាលពីសប្តាហ៍មុន។

ទីតាំងពីរទៀតនៅក្នុងតំបន់ Belgorod ក៏ត្រូវរងការបាញ់ប្រហារដោយកាំភ្លើងធំអ៊ុយក្រែនផងដែរកាលពីថ្ងៃព្រហស្បតិ៍។ អគ្គិភ័យ បានឆាបឆេះនៅស្ថានីយ៍ប្រេងឥន្ធនៈមួយកន្លែង ក្នុងភូមិព្រំដែន Nekhoteevka ខណៈផ្ទះចំនួន ១៤ ខ្នងត្រូវខូចខាតនៅក្នុងភូមិ Krasnyi Khutor នៅជិតនោះ។

គួរបញ្ជាក់ថា នេះគឺ​ជា​ការ​វាយ​ប្រហារ​លើក​ទី​ពីរ​របស់​អ៊ុយក្រែន​ក្នុងរយៈពេលត្រឹម​មួយសប្តាហ៍ ​ដែល​បណ្តាល​ឲ្យ​ជន​ស៊ីវិល​ស្លាប់។

កាល​ពី​ថ្ងៃ​ចន្ទ កងកម្លាំង​របស់ទី​ក្រុងកៀវ បាន​វាយ​ប្រហារ​ក្រុង Logachevka ភាគ​ខាង​ត្បូង​ទីប្រជុំជន Valuyki ដោយ​បាន​សម្លាប់​ស្ត្រីវ័យ​ចំណាស់​ម្នាក់ ខណៈ​ជន​ស៊ីវិល​បួន​នាក់​ផ្សេង​ទៀត​រង​របួស៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ រុស្ស៊ី បាញ់មីស៊ីល កម្ទេចទំនប់ទឹក អ៊ុយក្រែន ជន់លិចស្រុកកំណើតលោក Zelensky