តៃវ៉ាន់ ជួបគ្រោះរញ្ជួយដីធ្ងន់ធ្ងរ មានទាំងអ្នកស្លាប់ និងរបួស

ការរញ្ជួយដីកម្រិត ៦.៩ រ៉ិចទ័របានវាយប្រហារតំបន់ Hualien ភាគខាងកើតកោះតៃវ៉ាន់កាលពីរសៀល​ថ្ងៃ​អាទិត្យ បណ្តាល​ឲ្យ​មនុស្ស​ម្នាក់​ស្លាប់ និង​មួយ​ចំនួនទៀតកំពុងរងរបួស ។

យោងតាមមជ្ឈមណ្ឌលបណ្តាញរញ្ជួយដីចិន (CENC) បានឲ្យដឹងថា ចំណុចកណ្តាលត្រូវបានត្រួតពិនិត្យនៅរយៈទទឹង ២៣.១៥ ដឺក្រេ និងរយៈបណ្តោយ ១២១.៣០ ដឺក្រេ ហើយមានជម្រៅ ១០ គីឡូម៉ែត្រ ។

កម្មករ​រោងចក្រ​ស៊ីម៉ងត៍​មួយ​កន្លែង​នៅ​ចំណុច​កណ្តាល​ក្រុង Yuli បាន​រង​របួស និង​ស្លាប់​ បន្ទាប់​ពី​ទៅ​ដល់​មន្ទីរពេទ្យ ខណៈអគារកម្ពស់ ៣ ជាន់ក្នុងទីក្រុងមួយនេះក៏បានបាក់រលំសង្កត់មនុស្ស ៤ នាក់ផងដែរ ។ ប្រព័ន្ធផ្សព្វផ្សាយក្នុងស្រុកបាននិយាយថា ប្រហែល ៣ ម៉ោងក្រោយមក មនុស្សទាំង ៤ នាក់ រួមទាំងក្មេងស្រីអាយុ ៥ ឆ្នាំម្នាក់ត្រូវបានជួយសង្គ្រោះដោយសុវត្ថិភាព ។

ទន្ទឹមនោះ រថភ្លើង​មួយ​ខ្សែ​បានបង្វែរទិសដៅ បន្ទាប់ពី​ភ្លៀង​ធ្លាក់​នៅ​ក្នុង​ស្ថានីយ​រថភ្លើង ខណៈ​​ស្ពាន ​២ ​កន្លែងក៏បានបាក់ និង​បណ្តាល​ឲ្យ​មនុស្ស​ ៣ នាក់​រង​របួស ។ ទោះជាយ៉ាងណា ក្រោយមកពួកគេក៏ត្រូវបានជួយសង្គ្រោះផងដែរ ខណៈអ្នកទេសចរជាង ៤០០ នាក់ត្រូវបានជាប់គាំងនៅតំបន់ភ្នំក្នុងទីក្រុង Yuli ។

ឧប្បត្តិហេតុផ្សេងទៀតរួមមានរថភ្លើងត្រូវបានពន្យារពេល និងការដាច់ចរន្តអគ្គិសនី ហើយការងារសង្គ្រោះកំពុងដំណើរការ ខណៈទីក្រុងជាច្រើននៅតំបន់ Hualien និង Taitung បានប្រកាសថា ការងារ និងសាលារៀនទាំងអស់នឹងត្រូវផ្អាកចាប់ពីថ្ងៃចន្ទនេះទៅ ។

គួរបញ្ជាក់ថា តៃវ៉ាន់បានគ្រោះរញ្ជួយដី ចាប់តាំងពីថ្ងៃសៅរ៍មកម្ល៉េះ ពោលការរញ្ជួយដីកម្រិត ៦.៥ រ៉ិចទ័របានវាយលុកកោះនេះនៅម៉ោង ៩ និង ៤១ នាទីយប់ថ្ងៃសៅរ៍ ហើយមានការញ័រជាង ១០០ ដង ។ បន្ទាប់មកការរញ្ជួយដីកម្រិត ៥.៧ រ៉ិចទ័របានវាយប្រហារតំបន់ Taitung នៅម៉ោង ១ និង ១៩ នាទីរសៀល ខណៈក្រោយមកគ្រោះរញ្ជួយដីកម្រិត ៥.៤ រ៉ិចទ័របានវាយប្រហារតំបន់ Hualien នៅម៉ោង ៥ និង ៣៩ នាទីល្ងាចថ្ងៃអាទិត្យ ៕

ប្រែសម្រួលដោយ ៖ ជីវ័ន្ត

ប្រភព ៖ China.org.cn