ព័ត៌មានអន្ដរជាតិ

វៀតណាម ក៏មានមនុស្សស្លាប់ ដោយសារព្យុះ Noru ដែរ

បានផុស

១ year មុន

នៅ

ថ្ងៃសុក្រ ៣០ កញ្ញា ២០២២

ដោយ

សាកសពមនុស្ស ២ នាក់ក្នុងចំណោម ៣ នាក់ត្រូវបានរកឃើញនៅខេត្ត Nghe An ភាគកណ្តាលនៃប្រទេសវៀតណាម ក្រោយត្រូវបានហូរនាំទៅដោយទឹកជំនន់ដែលបង្កដោយព្យុះទីហ្វុង Noru ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គណៈកម្មាធិការជាតិសម្រាប់ការបង្ការ និងគ្រប់គ្រងគ្រោះមហន្តរាយធម្មជាតិបាននិយាយថា បុរសឈ្មោះ Nguyen Van Hue អាយុ ៥៥ ឆ្នាំជាអ្នកស្រុក Nghi Loc ត្រូវបានហូរកួចដោយទឹកជំនន់នៅក្នុងឃុំ Nghi Cong Nam កាលពីយប់ថ្ងៃពុធ ហើយសាកសពរបស់គាត់ត្រូវបានរកឃើញកាលពីព្រឹកថ្ងៃព្រហស្បតិ៍ ។

ចំណែកនៅឃុំ Ngoc Son នៃស្រុក Thanh Chuong, សាកសពឈ្មោះ Nguyen Huu Hoang អាយុ ៣៨ ឆ្នាំត្រូវបានទឹកនាំទៅបាត់ នៅពេលចុះនេសាទនៅម៉ោងប្រហែល ៣ ទៀបភ្លឺថ្ងៃព្រហស្បតិ៍ ហើយក្រោយមកសាកសពរបស់គាត់ត្រូវបានគេរកឃើញនៅពេលថ្ងៃត្រង់ ។

រហូតមកដល់ពេលនេះក្រុមអ្នកជួយសង្គ្រោះនៅតែព្យាយាមស្វែងរកបុរសម្នាក់ទៀតឈ្មោះ Bui Van Thanh អាយុ ៥៨ ឆ្នាំដែលបានបាត់ខ្លួន ខណៈពេលដែលគាត់កំពុងនៅលើទូកនេសាទក្នុងវាលស្រែដែលលិចទឹកក្នុងក្រុង Nam Dan ។

ទន្ទឹមនោះ យ៉ាងហោចណាស់មនុស្ស ៦២ នាក់ បានរងរបួសនៅក្នុងខេត្ត Quang Tri, ខេត្ត Thua Thien-Hue និងខេត្ត Quang Nam ហើយផ្ទះ ១៦០ ខ្នងត្រូវបានបំផ្លាញ និងជាង ៣,៣០០ ខ្នងរងការខូចខាត ខណៈផ្ទះជាង ៧,៣០០ ខ្នងនៅខេត្ត Nghe An កំពុងជន់លិចនៅឡើយ ។

ស្របពេលជាមួយគ្នានេះ ដំណាំប្រមាណ ៥,៣០០ ហិកតា និងវារីវប្បកម្ម ៣,០០០ ហិកតាក៏ត្រូវបានខូចខាតផងដែរ ខណៈដើមឈើចំនួន ៥,៣០០ ដើមបានបាក់រលំ ។ គោក្របី និងបសុបក្សីរាប់ពាន់ក្បាលក៏ត្រូវបានសម្លាប់ដូចគ្នាក្នុងគ្រោះទឹកជំនន់នេះ ហើយកំណាត់ផ្លូវជាច្រើនកំពុងជន់លិច ។

គួរបញ្ជាក់ថា ព្យុះ Noru បានបោកបក់ក្នុងទីក្រុង Da Nang និងខេត្ត Quang Nam ជាមួយនឹងល្បឿនខ្យល់អតិបរមា ១៣៣ គីឡូម៉ែត្រក្នុងមួយម៉ោង ហើយធ្វើឲ្យវាក្លាយជាព្យុះដ៏មានឥទ្ធិពលបំផុតមួយដែលបានវាយប្រហារប្រទេសវៀតណាមក្នុងរយៈពេល ២ ទសវត្សរ៍ចុងក្រោយនេះ ៕