ប្រទេសសមាជិក អឺរ៉ុប ពិចារណាសាងសង់ជញ្ជាំងតាមព្រំដែនជាមួយ រុស្ស៊ី

លោក Krzysztof Sobolewski អគ្គលេខាធិការនៃគណបក្សច្បាប់ និងយុត្តិធម៌របស់ប៉ូឡូញ បាននិយាយកាលពីពេលថ្មីៗនេះថា ទីក្រុង Warsaw គួរតែពិចារណាលើការកសាង “ជញ្ជាំង” នៅតាមព្រំដែនរបស់ខ្លួនជាមួយតំបន់ Kaliningrad របស់រុស្ស៊ី ដើម្បីការពារលំហូរនៃជនចំណាកស្រុកអាហ្រ្វិក និងអាស៊ីចូលទៅក្នុងប្រទេសប៉ូឡូញ ។

នៅក្នុងបទសម្ភាសន៍ជាមួយវិទ្យុ Polskie លោក Sobolewski បានសម្តែងការព្រួយបារម្ភអំពីការកើតឡើងម្តងទៀតនៃវិបត្តិជនចំណាកស្រុក ដូចឆ្នាំ ២០២១ នៅព្រំដែនបេឡារុស-ប៉ូឡូញ ។ លោកបានលើកឡើងពី “សង្រ្គាមកូនកាត់” ដែលបង្កឡើងដោយទីក្រុង Minsk និងទីក្រុងមូស្គូ ក៏ដូចជាការបើកតំបន់ Kaliningrad សម្រាប់ជើងហោះហើរពីប្រទេសតួកគី ស៊ីរី និងបេឡារុស ថាជាបញ្ហាចម្បងសម្រាប់វិបត្តិនេះ ។

មន្ត្រីរូបនេះបាននិយាយថា “យើងត្រូវតែពង្រឹងកងកម្លាំងរបស់យើងនៅលើផ្នែកពាក់ព័ន្ធនៃព្រំដែន ហើយក៏ពិចារណាផងដែរអំពីការសាងសង់ជញ្ជាំងព្រំដែនស្រដៀងគ្នាទៅនឹងតំបន់ដែលយើងមានជាមួយផ្នែកនៃ​ប៉ូឡូញ-បេឡារុស” ។

លោក Sobolewski បានបង្ហាញថា លោកបានមើលវិបត្តិកាលពីឆ្នាំមុននៅព្រំដែនបេឡារុស ក៏ដូចជាវិបត្តិដែលអាចកើតមាននាពេលអនាគតនៅព្រំដែនជាមួយតំបន់ Kaliningrad ដែលជាផ្នែកមួយនៃ “សង្រ្គាមកូនកាត់” ពាក់ព័ន្ធនឹងជនចំណាកស្រុកដែលត្រូវបានចោទប្រកាន់ថា ចាប់ផ្តើមដោយរុស្ស៊ី និងបេឡារុស ។

ទន្ទឹមនោះ នៅក្នុងការអត្ថាធិប្បាយដាច់ដោយឡែកមួយទៀតជាមួយសារព័ត៌មាន Reuters លោក Sobolewski បានព្យាករណ៍ថា ជនចំណាកស្រុកអាចចាប់ផ្តើមព្យាយាមឆ្លងពីតំបន់ Kaliningrad ទៅកាន់ប្រទេសប៉ូឡូញក្នុងពេលដ៏ខ្លីខាងមុខនេះ ។

វិបត្តិជនចំណាកស្រុកនៅតាមព្រំដែនរវាងប្រទេសបេឡារុស និងប៉ូឡូញ បានចាប់ផ្តើមនៅក្នុងខែមិថុនាឆ្នាំមុន នៅពេលដែលប្រធានាធិបតីបេឡារុសលោក Alexander Lukashenko បាននិយាយថា រដ្ឋាភិបាលរបស់លោកនឹងមិនជួយ EU បញ្ឈប់ការធ្វើអន្តោប្រវេសន៍ខុសច្បាប់ទៀតនោះទេ ដោយសារតែប្រទេសរបស់លោកមិនមានថវិកាគ្រប់គ្រាន់ បន្ទាប់ពីការដាក់ទណ្ឌកម្មរបស់ប្លុកមួយនេះ ៕

ប្រែសម្រួលដោយ ៖ ជីវ័ន្ត

ប្រភព ៖ RT

ចុចអាន ៖ រុស្ស៊ីធ្វើសមយុទ្ធនុយក្លេអ៊ែរ មិនបានប៉ុន្មានម៉ោងផង ស្រាប់តែអាមេរិក សាកល្បងមីស៊ីលល្បឿនលឿនជាងសំឡេងមួយដែរ