លោក ពូទីន ប្រកាស​បង្កើន​កិច្ចសហប្រតិបត្តិការ​យោធា​ ជាមួយ​សម្ព័ន្ធមិត្ត​ចាក់ទឹកមិនលិច​

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បាននិយាយនៅថ្ងៃអង្គារទី២០ខែធ្នូ ក្នុងទីក្រុង មីនស្កិ៍ អំឡុងសន្និសីទសារព័ត៌មានជាមួយសមភាគីលោក Alexander Lukashenko ថា ប្រទេសរុស្ស៊ី និងបេឡារុស នឹងបន្តធ្វើសមយុទ្ធរួមគ្នា ជាមួយគោលបំណងជំរុញការត្រៀមខ្លួនប្រយុទ្ធរបស់យោធាទាំង២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានាធិបតីរុស្ស៊ីបានបង្ហាញថា ទីក្រុងមូស្គូ និងទីក្រុង មីនស្កិ៍ បានបើកដំណើរការប្រព័ន្ធការពារ និងព្រមានផ្លូវអាកាសរួមគ្នារួចហើយ ហើយថា ឆាប់ៗនេះ រុស្ស៊ីអាចនឹងបណ្ដុះបណ្ដាលភីឡុតមកពីប្រទេសបេឡារុស ដើម្បីបើកយន្តហោះដែលបានកែច្នៃសម្រាប់ការប្រើគ្រាប់ពិសេស។

លោកពូទីនបាននិយាយទៀតថា សមាជិកនៃរដ្ឋសហភាពទាំងពីរ នឹងបន្តការអនុវត្តសមយុទ្ធរួមគ្នាជាទៀងទាត់ និងវិធានការផ្សេងទៀត ដែលត្រូវបានបង្កើតឡើងដើម្បីបង្កើនការត្រៀមខ្លួនខាងយោធា។

បន្ថែមពីលើការធ្វើឲ្យទំនាក់ទំនងយោធាកាន់តែស៊ីជម្រៅជាមួយរុស្ស៊ីនៅក្នុងរដ្ឋសហភាព, បេឡារុស នឹងចូលកាន់តំណែងជាប្រធានប្តូរវេននៃអង្គការសន្ធិសញ្ញាសន្តិសុខសមូហភាព (CSTO) នៅខែមករា។ ប្លុកយោធាដែលដឹកនាំដោយរុស្ស៊ីមួយនេះ ក៏រួមមានប្រទេសអាមេនី កាហ្សាក់ស្ថាន កៀហ្ស៊ីស៊ីស្ថាន និងតាហ្ស៊ីគីស្ថានផងដែរ។

គួរបញ្ជាក់ថា លោកពូទីន និងរដ្ឋមន្ត្រីការបរទេសរុស្ស៊ី Sergey Lavrov បានទៅដល់ទីក្រុង មីនស្កិ៍ កាលពីថ្ងៃចន្ទទី១៩ខែធ្នូ ដើម្បីពិភាក្សាជាមួយសមភាគីបេឡារុស ទាក់ទងនឹងកិច្ចសហប្រតិបត្តិការសេដ្ឋកិច្ច យោធា និងថាមពល៕

ប្រែសម្រួល៖ Vann Vann

ប្រភព៖ RT

ចុចអាន៖ អ៊ុយក្រែន ភ័យកាន់តែខ្លាំង ពេលលោក ពូទីន ធ្វើដំណើរទៅ បេឡារុស