ព័ត៌មានអន្ដរជាតិ

ប្រធានក្រុមប្រឹក្សា អឺរ៉ុប និយាយអ្វីខ្លះរឿងលោកស្រី Eva Kaili ពាក់ព័ន្ធអំពើពុករលួយធ្វើម្ចាស់ផ្ទះ World Cup នៅកាតា

បានផុស

៣ years មុន

នៅ

ថ្ងៃព្រហស្បតិ៍ ២២ ធ្នូ ២០២២

ដោយ

ប្រធានក្រុមប្រឹក្សាអឺរ៉ុប (EU) លោក Charles Michel បានប្រាប់ទស្សនាវដ្ដី Politico កាលពីថ្ងៃពុធថា រឿងអាស្រូវពុករលួយដែលនាំទៅដល់ការចាប់ខ្លួនអតីតអនុប្រធានសភាអឺរ៉ុបលោកស្រី Eva Kaili ពីបទទទួលសំណូកពីប្រទេសកាតាធ្វើម្ចាស់ផ្ទះ World Cup ឆ្នាំ ២០២២ កំពុងបំផ្លាញភាពជឿជាក់ដល់ EU ស្របពេលដែលប្លុកនេះរងគ្រោះរួចទៅហើយ ។

លោក Michel បាននិយាយថា ការចូលរួមរបស់សមាជិកសភាអឺរ៉ុប ក្នុងការបញ្ចុះបញ្ចូលដោយខុសច្បាប់ជាមួយរដ្ឋាភិបាលកាតា ជាថ្នូរនឹងប្រាក់រាប់លានអឺរ៉ូ កំពុងធ្វើឲ្យខូចដល់ភាពជឿជាក់របស់សហភាពអឺរ៉ុប ហើយវារឹតតែពិបាកសម្រាប់ពួកយើង ក្នុងការផ្តោតលើវិបត្តិសេដ្ឋកិច្ច និងថាមពល ដែលជះឥទ្ធិពលដល់ជីវិតរស់នៅរបស់ពលរដ្ឋអឺរ៉ុបនាពេលនេះ ។

ស្របពេលជាមួយគ្នានេះ លោក Michel បានស្នើឲ្យប្លុកនេះត្រូវតែធ្វើសកម្មភាពដើម្បីការពារការប្រព្រឹត្តបែបនេះតទៅទៀ ។ ដំបូងយើងត្រូវរៀនមេរៀនពីរឿងនេះ ហើយបង្កើតជាកញ្ចប់នៃវិធានការដើម្បីចៀសវាងរឿងបែបនេះកើតឡើងសាជាថ្មី ក៏ដូចជាដើម្បីការពារអំពើពុករលួយនាពេលអនាគតផងដែរ” ។

ទាំងលោកស្រី Kaili, ស្វាមីរបស់លោកស្រីគឺលោក Francesco Giorgi, លោក Pier Antonio Panzeri និងបុគ្គលម្នាក់ទៀតដែលមិនបញ្ចេញឈ្មោះត្រូវបានចោទប្រកាន់ពីបទ “ចូលរួមក្នុងអង្គការឧក្រិដ្ឋកម្ម ការលាងលុយកខ្វក់ និងអំពើពុករលួយ” ខណៈភរិយា និងកូនស្រីរបស់លោក Panzeri បច្ចុប្បន្នកំពុងស្ថិតនៅក្រោមការចាប់ខ្លួននៅក្នុងប្រទេសអ៊ីតាលី ហើយត្រូវបានគេជឿថាបានចូលរួមក្នុងរឿងអាស្រូវនេះដោយការដោះដូរសាច់ប្រាក់ និងអំណោយមួយចំនួន ។

ពាក់ព័ន្ធនឹងបញ្ហានេះដែរ អាជ្ញាធរបែលហ្ស៊ិករឹបអូសទ្រព្យសម្បត្តិបានជាង ១.៥ លានអឺរ៉ូពីទ្រព្យសម្បត្តិដែលជាប់ពាក់ព័ន្ធនឹងជនសង្ស័យទាំង ៤ នាក់នេះ ។ បើទោះជាយ៉ាងនេះក្ដី ប្រទេសកាតាបានបដិសេធការជាប់ពាក់ព័ន្ធក្នុងសំណុំរឿងពុករលួយដែលត្រូវបានស៊ើបអង្កេតដោយអាជ្ញាធរប៊ែលហ្ស៊ិក ជុំវិញការប្រកួតបាល់ទាត់ពិភពលោកឆ្នាំ ២០២២ ដែលប្រទេសកាតាធ្វើជាម្ចាស់ផ្ទះ និងថែមទាំងបានព្រមានថា នឹងជះឥទ្ធិពលអវិជ្ជមានដល់កិច្ចសហប្រតិបត្តិការសន្តិសុខ និងការពិភាក្សាស្តីពីសន្តិសុខថាមពលពិភពលោកផងដែរ ៕