ជប៉ុន​ សម្លាប់សត្វមាន់ ៤៥ម៉ឺនក្បាល ដោយសារផ្ទុះជំងឺផ្តាសាយបក្សីថ្មី

ទីភ្នាក់ងារសារព័ត៌មានជប៉ុនបានរាយការណ៍នៅថ្ងៃព្រហស្បតិ៍ទី១៩ខែធ្នូនេះថា ការផ្ទុះឡើងថ្មីនៃជំងឺផ្តាសាយបក្សី ត្រូវបានរកឃើញនៅក្នុងខេត្ត Gunma របស់ប្រទេសជប៉ុន ហើយការសម្លាប់សត្វមាន់ចំនួន ៤៥០ ០០០ក្បាល បានចាប់ផ្តើមរួចទៅហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារព័ត៌មានដដែលបានរាយការណ៍ថា ដំបូងជំងឺនេះត្រូវបានសង្ស័យនៅក្នុងកសិដ្ឋានមួយកន្លែងក្នុងទីក្រុង Maebashi ហើយក្រោយមក ការវិភាគហ្សែនបានបញ្ជាក់ពីវត្តមាននៃជំងឺគ្រុនផ្តាសាយបក្សី។

អាជ្ញាធរបានដាក់បម្រាមរួចហើយ លើការដឹកជញ្ជូនសត្វមាន់ និងស៊ុតក្នុងរង្វង់៣គីឡូម៉ែត្រ ជុំវិញចំណុចផ្ទុះ ក៏ដូចជាហាមឃាត់ការនាំចេញសត្វមាន់ និងស៊ុតនៅខាងក្រៅក្នុងរង្វង់១០គីឡូម៉ែត្រផងដែរ។

ដោយគិតទាំងការផ្ទុះឡើងចុងក្រោយនេះ ចំនួនសត្វមាន់ដែលត្រូវបានសម្លាប់នៅក្នុងប្រទេសជប៉ុនក្នុងរដូវនេះបានកើនឡើងលើស១០លានក្បាលហើយ ដែលនេះជាចំនួនច្រើនបំផុតក្នុងប្រទេសជប៉ុន។

កាលពីរដូវមុន ចាប់ពីខែវិច្ឆិកា ឆ្នាំ ២០២០ ដល់ចុងខែមីនា ឆ្នាំ ២០២១ សត្វមាន់ចំនួន ៩.៨៧ លានក្បាលត្រូវបានសម្លាប់ ហើយមានការផ្ទុះឡើងចំនួន៥២កន្លែងនៅក្នុងខេត្តចំនួន១៨៕

ប្រែសម្រួល៖​ Vann Vann

ប្រភព៖ Sputnik

ចុចអាន៖ លោកវេជ្ជបណ្ឌិត លី សូវ៉ាន់ បញ្ជាក់លទ្ធផល នៃ អ្នកជំងឺសង្ស័យឆ្លង ជំងឺផ្តាសាយបក្សី ១៣ នាក់