ឥណ្ឌូនេស៊ី បញ្ចេញវីដេអូនៃប្រតិបត្តិការស្វែងរកបំណែកយន្តហោះនៅបាតសមុទ្រ

កងទ័ពជើងទឹកឥណ្ឌូនេស៊ីបានបញ្ចេញវីដេអូនៃក្រុមអ្នកមុជទឹក កំពុងពិនិត្យមើលតាមបំណែកនៃយន្តហោះដឹកអ្នកដំណើរដែលបានធ្លាក់ចូលសមុទ្រកាលពីចុងសប្តាហ៍ខណៈការស្វែងរកប្រអប់ខ្មៅបានចាប់ផ្តើមឡើងវិញ។

យន្តហោះ Boeing 737 របស់ក្រុមហ៊ុនអាកាសចរណ៍ Sriwijaya Air បានចាកចេញពីទីក្រុងហ្សាការតាជាមួយមនុស្សចំនួន៦២នាក់ ប៉ុន្តែបានបាត់ខ្លួនពីរ៉ាដានៅតាមផ្លូវឆ្ពោះទៅកាន់កោះ Borneo កាលពីថ្ងៃសៅរ៍។

ក្រុមស្វែងរកបានរកឃើញកម្ទេចកម្ទីយន្ដហោះនិងបំណែកសាកសព។

ប្រអប់ខ្មៅរបស់យន្តហោះដែលគេកំណត់ទីតាំងបាន គឺមិនទាន់ត្រូវបានគេរកឃើញនៅឡើយទេ។

មន្ត្រីម្នាក់បានសង្កត់ធ្ងន់លើភាពបន្ទាន់នៃបេសកកម្មស្វែងរក ដោយហៅវាថាជា ប្រតិបត្តិការ២៤ម៉ោង។

លោក Rasman MS ប្រធានប្រតិបត្តិការរុករកនិងជួយសង្គ្រោះ បានប្រាប់អ្នកយកព័ត៌មានថា “វានឹងក្លាយជាប្រតិបត្តិការទាំងយប់ទាំងថ្ងៃ។ វានឹងមិនមានការឈប់សម្រាកទេ។ ឆាប់ៗនេះ យើងអាចរកឃើញជនរងគ្រោះ”។

យោងតាម AFP បានឲ្យដឹងថា បុគ្គលិកប្រមាណ២,៦០០នាក់ បច្ចុប្បន្នកំពុងចូលរួមក្នុងប្រតិបត្តិការស្វែងរក ជាមួយទូកនិងឧទ្ធម្ភាគចក្ររាប់សិបគ្រឿងដែលកំពុងស្រង់បំណែកសាកសព កម្ទេចកម្ទីនិងសម្លៀកបំពាក់របស់អ្នកដំណើរចេញពីទឹកជម្រៅ២៣ម៉ែត្រ។

ក៏មាននាវាជាង៥០គ្រឿងផងដែរដែលចូលរួមក្នុងការស្វែងរកបំណែកនៃជើងហោះហើរ SJ182។

ទោះបីជាយ៉ាងណាក៏ដោយ គ្មានសង្ឃឹមក្នុងការស្វែងរកអ្នកនៅរស់ទេ៕

ប្រែសម្រួលដោយ៖ Vann Vann

ប្រភព៖ BBC

ចុចអាន៖ ឥណ្ឌូនេស៊ី កំណត់បានទីតាំងនៃប្រអប់ខ្មៅរបស់យន្តហោះដែលធ្លាក់