មន្ត្រីក្រសួងការពារជាតិបេឡារុសបាននិយាយថា ពួកគេបានដាក់ពង្រាយកាំជ្រួចមីស៊ីលរយៈចម្ងាយជិត មានសមត្ថភាពនុយក្លេអ៊ែរ Iskander ដែលបានទិញពីប្រទេសរុស្ស៊ី ។

ក្រសួងបាននិយាយកាលពីថ្ងៃពុធថា ការដាក់ពង្រាយមីស៊ីល Iskander នេះ គឺបន្ទាប់ពីទាហានបេឡារុសបានបញ្ចប់ការហ្វឹកហ្វឺនពីសំណាក់យោធារុស្ស៊ី អំពីការអនុវត្តជាក់ស្ដែងនៅលើមូលដ្ឋានយោធានៅក្នុងប្រទេសបេឡារុស ។

ក្រសួង​បាន​និយាយទៀត​ថា ប្រព័ន្ធ​កាំជ្រួចមីស៊ីលនេះ​មាន​រយៈ​ចម្ងាយជិតមែន ប៉ុន្តែអាចហោះ​ដល់​ទៅ ៥០០ គីឡូម៉ែត្រឯណោះ ហើយ​អាច​វាយប្រហារ​គ្រប់​គោលដៅទាំងអស់ ជាមួយនឹងសមត្ថភាពផ្ទុកក្បាលគ្រាប់នុយក្លេអ៊ែរ ។

នៅក្នុងកិច្ចពិភាក្សាជាមួយប្រធានាធិបតីបេឡារុសលោក Alexander Lukashenko កាលពីខែមិថុនាកន្លងទៅ, ប្រធានាធិបតីរុស្ស៊ី លោក Vladimir Putin បានចង្អុលបង្ហាញថា ប្រព័ន្ធកាំជ្រួចមីស៊ីល Iskander នឹងត្រូវបានផ្គត់ផ្គង់ដល់ប្រទេសបេឡារុស នៅគ្រប់ដំណាក់កាលចាំបាច់ទាំងអស់ ។

ទន្ទឹមនោះ ការវិវឌ្ឍន៍ចុងក្រោយនេះកើតឡើង បន្ទាប់ពីប្រទេសបេឡារុស ដែលជាសម្ព័ន្ធមិត្តរបស់រុស្ស៊ី បានធ្វើសមយុទ្ធកងទ័ពអាកាសរួមគ្នាចាប់ពីថ្ងៃទី ១៦ ដល់ថ្ងៃទី ១៨ ខែមករាកន្លងមកនេះ ហើយវាក៏ត្រូវបានគេមើលឃើញដែរថា ជាការព្រមានដល់ប្រទេសលោកខាងលិច ដែលកំពុងបង្កើនការគាំទ្រផ្នែកយោធារបស់ពួកគេសម្រាប់អ៊ុយក្រែន ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ រុស្ស៊ី ព្រមាន អ៊ុយក្រែន ប្រយ័ត្នផ្ទុះសង្គ្រាមសាសនាដ៏ធំមួយទៀតនៅ អឺរ៉ុប