ម៉ាស៊ីនមួយរបស់យន្តហោះទេសចរណ៍ ដឹកមនុស្សចំនួន៣២១នាក់នៅក្នុងប្រទេសថៃ បានឆាបឆេះជាអណ្តាតភ្លើង ខណៈសម្បកកង់របស់វាបានផ្ទុះ ដែលនាំឲ្យភីឡុត បញ្ឈប់ការហោះហើរភ្លាមៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងគ្រាមានអាសន្ន, អ្នកដំណើរចំនួន៣០៩នាក់ និងក្រុមអាកាសយានិក១២នាក់នៅលើយន្តហោះទេសចរណ៍រុស្ស៊ីក្នុងខេត្តភូកេត ប្រទេសថៃ ត្រូវបានជម្លៀសចេញ និងបង្ខំឲ្យរង់ចាំជើងហោះហើរថ្មី។

រូបភាព និង​វីដេអូ​ដ៏​គួរ​ឲ្យ​ភ្ញាក់​ផ្អើល ​បាន​បង្ហាញ​ពីយន្តហោះ​ Boeing 767-306ER ​ត្រូវ​ភ្លើង​ឆាបឆេះ​ភ្លាមៗ​ដោយ​សារ​តែ​ការ​ផ្ទុះ​ម៉ាស៊ីន។ 

មានការសង្ស័យថា ក្រុមហ៊ុនអាកាសចរណ៍រុស្ស៊ីមិនបានឆ្លងកាត់ការត្រួតពិនិត្យសុវត្ថិភាព និងព្យាយាមប្រតិបត្តិការយន្តហោះវ័យចំណាស់ដែលគ្មានការថែទាំត្រឹមត្រូវ បន្ទាប់ពីការដាក់ទណ្ឌកម្មរបស់លោកខាងលិចយ៉ាងពាក់ព័ន្ធសង្រ្គាមរបស់លោក វ្ល៉ាឌីមៀរ ពូទីន នៅអ៊ុយក្រែន។

យន្តហោះអាយុ២៦ឆ្នាំមួយគ្រឿងនេះ ដំណើរការដោយក្រុមហ៊ុនជួល Azur Air ហើយកំពុងធ្វើដំណើរចេញពីអាកាសយានដ្ឋានអន្តរជាតិភូកេត ទៅកាន់ទីក្រុងមូស្គូ។

ក្រោយមក អ្នកដំណើរនៃជើងហោះហើរ ZF-3604 ត្រូវបានផ្តល់ជូនសណ្ឋាគារ អាហារក្តៅ និងភេសជ្ជៈ ខណៈពេលកំពុងរង់ចាំការចាកចេញទៅកាន់ទីក្រុងមូស្គូ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ ស្រ្តីពីរក្រុមឈ្លោះគ្នា វាយតប់ដល់របូតអាវ ផ្អើលអ្នកដំណើរពេញយន្តហោះ