មកដឹងមូលហេតុ ប្រធានធនាគារពិភពលោក ចុះចេញពីតំណែង

ប្រធានធនាគារពិភពលោក លោក David Malpass បានប្រកាសចុះចេញពីតំណែង​នៅថ្ងៃ​ទី ៣០ ខែឧសភា ឆ្នាំ២០២៣ ខាងមុខនេះ បន្ទាប់ពីមានបញ្ហាចម្រូងចម្រាស់ពាក់ព័ន្ធនឹងការបម្រែបម្រួលអាកាសធាតុ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Malpass ទទួលរងការរិះគន់យ៉ាងខ្លាំងលើការប្តេជ្ញាចិត្តរបស់ធនាគារពិភពលោកចំពោះសកម្មភាពអាកាសធាតុ និងលើទស្សនៈផ្ទាល់ខ្លួនរបស់លោក ។ ទន្ទឹមនឹងនោះ លោកត្រូវបានគេដឹងថា ស្ថិតនៅក្រោមសម្ពាធកាន់តែខ្លាំងឡើងចាប់តាំងពីខែកញ្ញាឆ្នាំមុន នៅពេលដែលគាត់បានបដិសេធមិនទទួលយកជាសាធារណៈ ពាក់ព័ន្ធជាមួយការដុតឥន្ធនៈហ្វូស៊ីលដែលធ្វើឲ្យភពផែនដីឡើងកម្ដៅ ។

ពាក់ព័ន្ធជាមួយថវិកាវិញ ធនាគារពិភពលោក បានចំណាយជាង ៣២ ពាន់លានដុល្លារក្នុងឆ្នាំ ២០២២ ដែលខ្ទង់ចំណាយនេះ​កើនឡើងទ្វេរដង ដើម្បីជួយប្រទេសនានាក្នុងការដោះស្រាយបញ្ហាបម្រែបម្រួលអាកាសធាតុ ខណៈកត្តានេះហើយបានធ្វើឲ្យធនាគារពិភពលោក ទទួលការរិះគន់ជាខ្លាំង ។

ទន្ទឹមនោះ ចំពោះការប្រកាសចាកចេញរបស់លោកនៅពេលនេះដែរក៏កើតឡើង ស្របពេលដែលធនាគារពិភពលោកបានបង្ហាញពីចេតនារបស់ខ្លួនក្នុងការធ្វើឲ្យសកម្មភាពអាកាសធាតុកាន់តែមានសារៈសំខាន់សម្រាប់បេសកកម្មនាពេលខាងមុខ ។

សូមបញ្ជាក់ថា លោក David Malpass ត្រូវបានតែងតាំងជាប្រធានធនាគារពិភពលោកដោយអតីតប្រធានាធិបតីអាមេរិកលោក Donald Trump នៅក្នុងឆ្នាំ ២០១៩ ខណៈដែលអាមេរិកជាសមាជិកភាគហ៊ុនធំជាងគេនៅក្នុងធនាគារមួយនេះ ៕

ប្រែសម្រួលដោយ ៖ នាង​ រតនៈ

ប្រភព ៖​ Climate Home News, CNN

ចុចអាន ៖ ប្រទេសសម្ព័ន្ធមិត្ត រុស្ស៊ី មិនត្រូវការអាវុធនុយក្លេអ៊ែរវាយប្រហារ អាមេរិក និងអឺរ៉ុបឡើយ