ខួបគម្រប់ ១ ឆ្នាំ អ៊ុយក្រែន បញ្ចេញក្រដាសប្រាក់ថ្មី បង្ហាញពីឧក្រិដ្ឋកម្ម​សង្គ្រាមរបស់ រុស្ស៊ី

ធនាគារកណ្តាលរបស់ប្រទេសអ៊ុយក្រែនបានបង្ហាញក្រដាសប្រាក់ថ្មី ២០ រីវញៀ (ស្មើ ០.៥៤ ដុល្លារ) កាលពីថ្ងៃព្រហស្បតិ៍ ក្នុងខួបគម្រប់ ១ ឆ្នាំនៃប្រតិបត្តិការសឹករបស់រុស្ស៊ី ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្នែកម្ខាងនៃក្រដាសប្រាក់ថ្មីនេះបង្ហាញពីរូបទាហាន ៣ នាក់កំពុងលើកទង់ជាតិអ៊ុយក្រែន ខណៈនៅម្ខាងទៀតមានរូបភាពដៃទាំងសងខាងចងជាប់គ្នាដោយស្កុត ដោយចង់សំដៅចំពោះការប្រព្រឹត្តឧក្រិដ្ឋសង្គ្រាម ដែលទីក្រុងកៀវបានចោទប្រកាន់ទៅដល់កងកម្លាំងរុស្ស៊ី ។

លោក Andriy Pyshnyi ទេសាភិបាលធនាគារជាតិនៃអ៊ុយក្រែនបាននិយាយថា “ដើម្បីប្រារព្ធខួប ១ ឆ្នាំនៃសង្រ្គាម យើងបានសម្រេចចិត្តបញ្ចេញក្រដាសប្រាក់ថ្មីនេះចំនួន ៣០ ម៉ឺនសន្លឹក ដើម្បីចរាចរណ៍នៅលើទីផ្សារ បន្ទាប់ពីធនាគារបានចំណាយពេលប្រហែល ៨ ខែដើម្បីរចនា និងផលិតវាឡើង” ។

លោក Pyshnyi បញ្ជាក់ទៀតថា “ធនាគារក៏គ្រោងនឹងបោះពុម្ភក្រដាសប្រាក់ថ្មីៗបន្ថែមទៀតផងដែរ ដើម្បីផ្ដល់នូវភស្តុតាង ក៏ដូចជាការកត់ត្រាទុកអំពីសង្គ្រាមដ៏ឃោរឃៅមួយនេះ” ។

គួរបញ្ជាក់ថា គិតត្រឹមពេលនេះ ប្រតិបត្តិការសឹករបស់រុស្ស៊ីលើអ៊ុយក្រែនបានឈានដល់ខួប ១ ឆ្នាំហើយ បន្ទាប់ពីលោកប្រធានាធិបតី វ្ល៉ាឌីមៀរ ពូទីន ប្រកាសបើកការវាយលុកលើរដ្ឋាភិបាលទីក្រុងកៀវកាលពីថ្ងៃទី២៤ ខែកុម្ភៈ ឆ្នាំ ២០២២ ៕

ប្រែសម្រួលដោយ ៖ ជីវ័ន្ត

ប្រភព ៖ Reuters

ចុចអាន ៖ អ៊ុយក្រែន អះអាងថា រុស្ស៊ី ទើបតែប្រើមីស៊ីលជំនាន់ឆ្នាំ ៦០ ប៉ុណ្ណោះ (មានវីដេអូ)