ជនចំណាកស្រុកចំនួន៥៩នាក់ ដោយក្នុងនោះមានទាំងកុមារ១២នាក់ផងដែរ បានស្លាប់ និងរាប់សិបនាក់ទៀតកំពុងបាត់ខ្លួន បន្ទាប់ពីទូករបស់ពួកគេលិចក្នុងសមុទ្រនៅភាគខាងត្បូងប្រទេសអ៊ីតាលី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទូកបានដាច់ជាពីរដោយសារបុកនឹងថ្ម ខណៈព្យាយាមចូលច្រាំងនៅជិតទីក្រុងឆ្នេរសមុទ្រ Crotone ក្នុងតំបន់ Calabria។ អ្នករស់រានមានជីវិតនិយាយថា មនុស្សយ៉ាងតិច១៥០នាក់បានជិះទូកនេះ។

រដ្ឋមន្ត្រីមហាផ្ទៃអ៊ីតាលីលោក Matteo Piantedosi បានចុះទៅពិនិត្យកន្លែងកើតហេតុ ដោយនិយាយថា មនុស្សរហូតដល់ទៅ៣០នាក់ ប្រហែលជាកំពុងបាត់ខ្លួន។

យោងតាមទីភ្នាក់ងារសារព័ត៌មាន Ansa របស់ប្រទេសអ៊ីតាលី, ទារកម្នាក់ដែលគេគិតថាមានអាយុត្រឹមតែប៉ុន្មានខែប៉ុណ្ណោះ គឺស្ថិតក្នុងចំណោមអ្នកស្លាប់។

ស្របពេលជាមួយគ្នានោះ ឆ្មាំឆ្នេរសមុទ្រនិយាយថា មនុស្ស៨០នាក់ ត្រូវបានគេរកឃើញនៅរស់រួមទាំងអ្នកខ្លះដែលហែលទៅដល់ច្រាំងផងដែរបន្ទាប់ពីការលិច។

គួរបញ្ជាក់ថា ទូកនេះបានចេញ​ដំណើរ​មក​ពី​ប្រទេស​តួកគីកាលពី​ប៉ុន្មាន​ថ្ងៃ​មុន ដោយ​ដឹក​អ្នក​ដំណើរចេញ​ពី​ប្រទេស​អាហ្វហ្គានីស្ថាន ប៉ាគីស្ថាន សូម៉ាលី និង​អ៊ីរ៉ង់។

ទូកនេះគឺដឹកមនុស្សមួយចំនួនធំដែលភៀសខ្លួនចេញពីជម្លោះ ឬគេចចេញពីភាពក្រីក្រក្នុងទ្វីបអាហ្រ្វិកឆ្ពោះទៅកាន់ប្រទេសអ៊ីតាលីជារៀងរាល់ឆ្នាំ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ ក្មេងៗសិស្សសាលា ៤៩នាក់ស្លាប់ ក្នុងសោកនាដកម្មលិចទូក នៅ ប៉ាគីស្ថាន