កាលពីថ្ងៃអង្គារទី០៧ខែមីនា ប្រទេសអ៊ីរ៉ង់ បានប្រកាសពីការចាប់ខ្លួនមនុស្សច្រើននាក់ ក្នុងករណីនៃការបំពុលដ៏អាថ៌កំបាំងលើសិស្សសាលាស្រី ដែលធ្វើឲ្យប៉ះពាល់ដល់សិស្សជាង៥០០០នាក់ចាប់តាំងពីចុងខែវិច្ឆិកាមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃចន្ទ មេដឹកនាំកំពូលលោក Ayatollah Ali Khamenei បានអំពាវនាវ កុំឲ្យមានការលើកលែងឲ្យសោះចំពោះជនល្មើសនៃឧក្រិដ្ឋកម្មនេះ ហើយឈានដល់ថ្នាក់ប្រហារជីវិតជនល្មើស ស្របពេលមានកំហឹងសាធារណៈកាន់តែខ្លាំងឡើង។

ក្រសួងមហាផ្ទៃបាននិយាយនៅក្នុងសេចក្តីថ្លែងការណ៍មួយថា “មនុស្សមួយចំនួនដែលសង្ស័យថា បានផលិតសារធាតុគ្រោះថ្នាក់ ត្រូវបានចាប់ខ្លួននៅក្នុងខេត្តចំនួនប្រាំមួយ រួមទាំងឪពុកម្តាយរបស់សិស្សផងដែរ”។

អនុរដ្ឋមន្ត្រីក្រសួងមហាផ្ទៃអ៊ីរ៉ង់ លោក Majid Mirahmadi បានប្រាប់ទូរទស្សន៍រដ្ឋថា “ទីភ្នាក់ងារស៊ើបការណ៍សម្ងាត់បានធ្វើការចាប់ខ្លួនមនុស្សច្រើននាក់ ហើយទីភ្នាក់ងារពាក់ព័ន្ធកំពុងធ្វើការស៊ើបអង្កេតពេញលេញ”។

គួរបញ្ជាក់ថា សាលារៀនជាច្រើននៅទូទាំងប្រទេសអ៊ីរ៉ង់ ត្រូវបានវាយប្រហារដោយការបំពុលចាប់តាំងពីចុងខែវិច្ឆិកាមក ដោយសិស្សមានរោគសញ្ញាដូចជាដកដង្ហើមខ្លី ចង្អោរ និងវិលមុខ ជាដើម។ សិស្សទាំងនោះ ក៏បានប្រាប់ថា មានក្លិនមិនល្អនៅក្នុងបរិវេណសាលារបស់ពួកគេផងដែរ៕

ប្រែសម្រួល៖ Vann Vann

ប្រភព៖ Arab News

ចុចអាន៖ មេដឹកនាំអ៊ីរ៉ង់ ប្រកាសប្រហារជីវិតជននៅពីក្រោយការបំពុល ក្មេងស្រីសិស្សសាលាជាង ១ពាន់នាក់