អាមេរិក អន់ចិត្តជាមួយ រុស្ស៊ី ដែលមានអាវុធល្បឿនលឿនជាងសំឡេង​ទំនើបជាង

ប្រធាននាយកដ្ឋានមិនរីកសាយភាយ និងគ្រប់គ្រងអាវុធរបស់រុស្ស៊ីលោក Vladimir Yermakov បានប្រាប់សារព័ត៌មាន TASS កាលពីថ្ងៃចន្ទថា សហរដ្ឋអាមេរិកកំពុងអន់ចិត្តជាមួយរុស្ស៊ី ដោយសារតែទីក្រុងមូស្គូបាននាំមុខទីក្រុងវ៉ាស៊ីនតោនក្នុងការអភិវឌ្ឍន៍អាវុធលឿនជាងសំឡេងទាំងទំនើប និងកម្រិតខ្ពស់ជាងខ្លួន ។

អ្នកការទូតរូបនេះបានកត់សម្គាល់ថា “សហរដ្ឋអាមេរិកមានការអាក់អន់ស្រពន់ចិត្តខ្លាំងមែនទែន ដែលមិនអាចតាមទាន់រុស្ស៊ីក្នុងការអភិវឌ្ឍន៍ និងការដាក់ឲ្យដំណើរការនូវសព្វាវុធដែលមានសមត្ថភាពល្បឿនលឿនជាងសំឡេងកម្រិតខ្ពស់” ។

ប៉ុន្តែលោកទទួលស្គាល់ថា “សហរដ្ឋអាមេរិកនៅតែជាប្រទេសដែលមានបច្ចេកវិទ្យាខ្ពស់ និងមានថវិកាយោធាច្រើនជាងគេ ហើយនៅថ្ងៃណាមួយគម្រោងអាវុធល្បឿនលឿនជាងសំឡេងរបស់ពួកគេ ក៏នឹងឈានដល់ដំណាក់កាលកំពូលផងដែរ ។ ប៉ុន្តែទម្រាំអាមេរិកឈានដល់ពេលនោះ អ្នកឯកទេសអាវុធរបស់យើង អាចនឹងបង្កើតអ្វីផ្សេងទៀត លើសពីអាវុធល្បឿនលឿនជាងសំឡេងរបស់អាមេរិកទៅទៀត” ។

ទោះជាយ៉ាងណាលោក Yermakov បានកត់សម្គាល់ថា “ទីក្រុងមូស្គូមិនឈ្លក់វង្វេងនឹងការប្រកួតប្រជែងចំពោះសព្វាវុធដែលមានសមត្ថភាពល្បឿនលឿនជាងសំឡេងជាមួយសហរដ្ឋអាមេរិកនោះទេ” ។

ជាចុងក្រោយ លោកបានសន្និដ្ឋានថា “ដោយផ្អែកលើគោលដៅការពារជាតិដែលមានស្រាប់ និងការគំរាមកំហែងដែលកំពុងវិវត្ត យើងនឹងបន្តផលិតអាវុធរបស់យើងយ៉ាងស្ងាត់ស្ងៀម និងធ្វើវាឲ្យល្អឥតខ្ចោះ ទៅតាមគោលការណ៍ និងគោលដៅរបស់យើង” ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ រុស្ស៊ី ប្រាប់គោលដៅសំខាន់ទើបឈានដល់ផ្ទុះសង្គ្រាមជាមួយ អ៊ុយក្រែន