ជប៉ុន ចង់ឲ្យមានស្ត្រី ៣០ ភាគរយ កាន់តំណែងកំពូលក្នុងក្រុមហ៊ុនធំៗ

នាយករដ្ឋមន្ត្រីជប៉ុនលោក Kishida Fumio ចង់ឃើញស្ត្រីស្ថិតនៅក្នុងមុខតំណែងប្រតិបត្តិយ៉ាងហោចណាស់ ៣០ ភាគរយនៅតាមបណ្ដាក្រុមហ៊ុនកំពូលៗរបស់ប្រទេសជប៉ុននៅឆ្នាំ ២០៣០ ដើម្បីជាការលើកកម្ពស់ស្ត្រីនៅក្នុងវិស័យ​ធុរកិច្ច ។

គោលនយោបាយថ្មីរបស់លោកនាយករដ្ឋមន្ត្រីជប៉ុនរូបនេះត្រូវបានលើកឡើងនៅក្នុងកិច្ចប្រជុំនៃក្រុមប្រឹក្សាសម្រាប់សមភាពយេនឌ័រ របស់រដ្ឋាភិបាលដែលបានធ្វើឡើងកាលពីថ្ងៃព្រហស្បតិ៍ ។

ទន្ទឹមនោះ លោក Kishida ក៏បានអំពាវនាវឲ្យមានវិធានការដើម្បីអនុញ្ញាតឲ្យស្ត្រីដែលមានការងារ​មិនទៀងទាត់ ក្លាយជាបុគ្គលិកធម្មតាពេញម៉ោង និងបណ្តុះបណ្តាលស្រ្តីទាំងនោះឲ្យទទួលបានជំនាញបច្ចេកវិទ្យាផងដែរ ។ ដូច្នេះវានឹង​ជួយ​បង្កើន​ប្រាក់​ចំណូល​របស់​ពួកគេ និង​អនុញ្ញាតឲ្យពួកគេ​សម្រេច​បាន​នូវ​ឯករាជ្យភាព​ផ្នែក​ហិរញ្ញវត្ថុផងដែរ ។

មិនតែប៉ុណ្ណោះ លោកនាយករដ្ឋមន្ត្រីក៏បានបង្ហាញពីផែនការបង្កើតយន្តការថ្មីនៃកិច្ចសហប្រតិបត្តិការរវាងស្ថាប័ន សាធារណៈ និងឯកជន ដើម្បីលុបបំបាត់អំពើហិង្សាលើស្ត្រីផងដែរ ។

គួរបញ្ជាក់ថា បច្ចុប្បន្ន ជប៉ុនកំពុងតស៊ូដើម្បីកែលម្អគម្លាតយេនឌ័រនៅក្នុងមុខតំណែងជាអ្នកដឹកនាំ ជាពិសេសនៅក្នុងផ្នែកនយោបាយ និងផ្នែកអាជីវកម្ម ក៏ដូចជាគម្លាតប្រាក់ឈ្នួលរវាងកម្មករបុរស និងស្ត្រីផងដែរ ៕

ប្រែសម្រួល ៖​ នាង រតនៈ

ប្រភព ៖​ NHK

ចុចអាន៖ ៤៧ ឆ្នាំទៀត ប្រជាជន ជប៉ុន នឹងធ្លាក់ចុះច្រើនជាង ៣០ ភាគរយ