៤៧ ឆ្នាំទៀត ប្រជាជន ជប៉ុន នឹងធ្លាក់ចុះច្រើនជាង ៣០ ភាគរយ

អ្នកស្រាវជ្រាវជប៉ុនដោយផ្អែកលើជំរឿនឆ្នាំ ២០២០ ប៉ាន់ប្រមាណថា ចំនួនប្រជាជនរបស់ប្រទេសជប៉ុននឹងធ្លាក់ចុះជាង ៣០ ភាគរយ មកនៅត្រឹម ៨៧ លាននាក់ប៉ុណ្ណោះនៅឆ្នាំ ២០៧០ ។

គិតត្រឹមឆ្នាំ ២០២០ ជប៉ុន​មានប្រជាជនប្រហែល ១២៦.១៥ លាននាក់ គិតរួមជាមួយជនបរទេសដែលកំពុងរស់នៅក្នុងជប៉ុន ហើយតួលេខនេះ គេរំពឹងនឹងធ្លាក់ចុះក្រោម ១០០ លាននាក់ក្នុងឆ្នាំ ២០៥៦ ។

អាយុកាលជាមធ្យមរបស់ជនជាតិជប៉ុនក្នុងឆ្នាំ ២០២០ គឺ ៨១.៥៨ ឆ្នាំសម្រាប់បុរស និង ៨៧.៧២ ឆ្នាំសម្រាប់ស្ត្រី ខណៈនៅ ៤៧ ឆ្នាំខាងមុខ ពោលនៅឆ្នាំ ២០៧០ អាយុកាលជាមធ្យមរបស់ប្រជាជនជប៉ុនត្រូវបានគេរំពឹងថា នឹងកើនឡើងដល់ ៨៥.៨៩ ឆ្នាំ និង ៩១.៩៤ ឆ្នាំ ។

មនុស្សដែលមានអាយុចាប់ពី ៦៥ ឆ្នាំឡើងទៅនឹងមាន ៣៨.៧ ភាគរយនៃចំនួនប្រជាជនជប៉ុនក្នុងឆ្នាំ ២០៧០ ធៀបនឹង ២៨.៦ ភាគរយក្នុងឆ្នាំ ២០២០។

ដោយឡែក ចំនួនកំណើតប្រចាំឆ្នាំត្រូវបានរំពឹងថា នឹងធ្លាក់ចុះក្រោម ៧០ ម៉ឺននាក់ក្នុងឆ្នាំ ២០៤៣ ហើយចំនួនកុមារជាមធ្យមក្នុងស្ត្រីម្នាក់ក៏ត្រូវបានកាត់បន្ថយផងដែរ ។

ម៉្យាងវិញទៀត ប្រជាជនដែលមិនមែនជាជនជាតិជប៉ុនត្រូវបានគេរំពឹងថា នឹងកើនឡើងដល់ ១០.៨ ភាគរយនៃចំនួនសរុបនៅឆ្នាំ ២០៧០ ។

គួរបញ្ជាក់ថា បច្ចុប្បន្ន ជប៉ុនកំពុងបារម្ភយ៉ាងខ្លាំងជាមួយបញ្ហាអត្រាកំណើតប្រជាជន ខណៈរដ្ឋាភិបាល​ក៏បានផ្តល់ជូនសំណើលើកទឹកចិត្តជាច្រើន ដើម្បីឲ្យប្រជាពលរដ្ឋបង្កើនការយកកូនផងដែរ ៕

ប្រែសម្រួល៖ នាង រតនៈ

ប្រភព ៖ NHK

ចុចអាន៖ ហេតុអ្វីបានជា ចិន បង្កើនទុនបម្រុងមាសរបស់ខ្លួន?