លោក ថាក់ស៊ីន បង្ហាញតម្រុយត្រឡប់ចូលស្រុកវិញ

អតីតនាយករដ្ឋមន្ត្រីថៃលោក ថាក់ស៊ីន ស៊ីណាវ៉ាត់ត្រា បានប្រកាសនៅលើប្រព័ន្ធផ្សព្វផ្សាយសង្គមថា លោកចង់ត្រឡប់ទៅផ្ទះនៅក្នុងប្រទេសថៃវិញ ដើម្បីមកមើលចៅប្រុសថ្មីរបស់លោក ។

កាលពីថ្ងៃចន្ទកូនស្រីរបស់លោក ថាក់ស៊ីន គឺលោកស្រី ផេថងថាន ស៊ីណាវ៉ាត់ត្រា សម្រាលបានកូនប្រុសម្នាក់ ឈ្មោះ Prutthasin Sooksawas និងជាចៅទី ៧ របស់លោក ថាក់ស៊ីន ស្របពេលដែលលោកកំពុងរស់នៅនិរទេសខ្លួន ។

តាមរយៈការសរសេរបង្ហោះនៅលើបណ្ដាញ Twitter, អតីតនាយករដ្ឋមន្ត្រីរូបនេះបាននិយាយថា ខ្ញុំរីករាយណាស់ដែលបានស្វាគមន៍ចៅទី ៧ ហើយ​ខណៈ​ដែល​ខ្ញុំ​នឹង​មាន​អាយុ ៧៤ ឆ្នាំ​នៅ​ខែកក្កដា​នេះ ខ្ញុំ​ចង់​សុំ​ការអនុញ្ញាត​ដើម្បី​ត្រឡប់​ទៅ​មើល​ថែ​ចៅ​របស់ខ្ញុំ​វិញ ។ ជួបគ្នាឆាប់ៗនេះ” ។

ទន្ទឹមនោះ កន្លងមកលោក ថាក់ស៊ីន ក៏បាន​បញ្ចេញ​តម្រុយ​ជាច្រើនផងដែរ ​អំពី​ការវិល​ត្រឡប់​ទៅ​ប្រទេស​ថៃ​វិញ ។ ជាក់ស្ដែង លោកបានប្រាប់សារព័ត៌មានជប៉ុន Kyodo News កាលពីថ្ងៃទី២៤ ខែមីនាថា គាត់សុខចិត្តប្រឈមមុខនឹងច្បាប់ ប្រសិនបើគាត់អាចចំណាយពេលពេញមួយជីវិតជាមួយក្រុមគ្រួសាររបស់គាត់ ។

គួរបញ្ជាក់ថា លោក ថាក់ស៊ីន បានរស់នៅនិរទេសខ្លួន ចាប់តាំងពីឆ្នាំ ២០០៨ មកម្ល៉េះ ដោយចំណាយពេលភាគច្រើននៅក្នុងទីក្រុងឌូបៃ បន្ទាប់ពីរដ្ឋាភិបាលរបស់គាត់ត្រូវបានបណ្តេញចេញដោយរដ្ឋប្រហារយោធាដឹកនាំដោយលោកឧត្តមសេនីយ Sonthi Boonyaratglin កាលពីថ្ងៃទី១៩ ខែកញ្ញា ឆ្នាំ២០០៦ ហើយលោក ថាក់ស៊ីន ក៏ប្រឈមមុខនឹងការចោទប្រកាន់ និងកាត់ទោសដាក់ពន្ធនាគារជាច្រើនដងផងដែរ ជុំវិញការចោទប្រកាន់ពីបទរំលោភបំពានអំណាច ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ បក្សភឿថៃ ឲ្យគណៈកម្មាធិការរៀបចំការបោះឆ្នោត ពន្យល់មូលហេតុ បោះពុម្ពសន្លឹកឆ្នោតច្រើនជាងអ្នកបោះ