ព័ត៌មានអន្ដរជាតិ

បក្សភឿថៃ ឲ្យគណៈកម្មាធិការរៀបចំការបោះឆ្នោត ពន្យល់មូលហេតុបោះពុម្ពសន្លឹកឆ្នោតច្រើនជាងអ្នកបោះ

បានផុស

៣ years មុន

នៅ

ថ្ងៃសៅរ៍ ២៩ មេសា ២០២៣

ដោយ

គណបក្សភឿថៃកំពុងដាក់សម្ពាធលើគណៈកម្មាធិការរៀបចំការបោះឆ្នោត (EC) ឲ្យពន្យល់ពីមូលហេតុដែលសន្លឹកឆ្នោតមានចំនួនដល់ទៅ ៧.៣ លានសន្លឹក ដែលច្រើនជាងចំនួនអ្នកដែលមានសិទ្ធិបោះឆ្នោតទៅទៀត ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គលេខាធិការគណបក្សភឿថៃ លោក Prasert Jantararuangtong បាននិយាយថា ប្រទេសថៃមានអ្នកដែលមានសិទ្ធិបោះឆ្នោតចំនួន ៥២,២៨៧,០៤៥ នាក់ ប៉ុន្តែគណៈកម្មាធិការរៀបចំការបោះឆ្នោត (EC) បានបោះពុម្ពសន្លឹកឆ្នោតចំនួន ៥៧ លានសន្លឹក បូករួមទាំងសន្លឹកឆ្នោតបម្រុងចំនួន ២.៦ លានសន្លឹកទៀត ។ ជាសរុបសន្លឹកឆ្នោតមានចំនួន ៧.៣ លានសន្លឹក ពោលច្រើនជាងចំនួនអ្នកមានសិទ្ធិបោះឆ្នោត ។

លោក Prasert ដែលជាប្រធានមជ្ឈមណ្ឌលប្រតិបត្តិការរបស់គណបក្សភឿថៃសម្រាប់ការបោះឆ្នោតសកលនៅថ្ងៃទី ១៤ ខែឧសភា បានសួរថា តើ EC មានប្រព័ន្ធណាមួយដើម្បីធានាថា សន្លឹកឆ្នោតបន្ថែមទាំងអស់នឹងត្រូវបានប្រគល់មកវិញ ប្រសិនបើមិនត្រូវបានប្រើ ។

ទន្ទឹមនោះ លោក Prasert បានជំរុញឲ្យ EC បំពេញតួនាទីរបស់ខ្លួនដោយប្រុងប្រយ័ត្ន និងដោយមនសិការ ហើយលោកក៏បានចង្អុលបង្ហាញពីកំហុសមួយចំនួននៅក្នុងឯកសាររបស់ EC ពាក់ព័ន្ធនឹងបេក្ខជនគណបក្សភឿថៃ ដែលលោកថា អាចបំភាន់អ្នកដែលមានសិទ្ធិបោះឆ្នោត ។

លោកបានបញ្ជាក់ថា បក្សភឿថៃនឹងសរសេរលិខិតទៅ EC ដើម្បីសួរអំពីការរៀបចំរបស់ខ្លួននៅមុនការបោះឆ្នោត ហើយបក្សភឿថៃ ក៏នឹងស្វែងរកចម្លើយអំពីចំនួនសន្លឹកឆ្នោតពិតប្រាកដ របៀបដោះស្រាយសន្លឹកឆ្នោតបន្ថែម ការដឹកជញ្ជូន និងការរក្សាទុកសន្លឹកឆ្នោត ក៏ដូចជារបៀបដែល EC នឹងរក្សាទុកសន្លឹកឆ្នោតផងដែរ ។

គួរបញ្ជាក់ថា គណបក្សភឿថៃដែលក៏មានកូនស្រីរបស់លោក ថាក់ស៊ីន ជាបេក្ខភាពនាយករដ្ឋមន្ត្រីផងដែរនោះ មានគោលបំណងសម្រេចបានជ័យជម្នះភ្លូកទឹកភ្លូកដីនៅក្នុងការបោះឆ្នោតនៅខែក្រោយ ដើម្បីនាំគណបក្សមួយនេះវិលត្រឡប់មកកាន់អំណាចវិញ បន្ទាប់ពីខកខានអស់រយៈពេល ៨ ឆ្នាំ ដោយសារតែរដ្ឋប្រហារ ៕

ប្រែសម្រួលដោយ ៖ ជីវ័ន្ត

ប្រភព ៖ The Nation

ចុចអាន ៖ មេបក្សប្រឆាំង អាហ្វ្រិកខាងត្បូង ព្រមានចាប់លោក ពូទីន បើហ៊ានឈានជើងចូលមកប្រទេសរបស់ខ្លួន