ឡាវ សម្លាប់ជ្រូករាប់រយក្បាលដែលរត់ពន្ធមកពី វៀតណាម

អាជ្ញាធរស្រុក Nong Het ខេត្ត Xieng Khouang ប្រទេសឡាវ បានរឹបអូសជ្រូករត់ពន្ធខុសច្បាប់ និងមានមេរោគចំនួន ២៤០ ក្បាលពីប្រទេសវៀតណាមយកទៅសម្លាប់ចោល ។

តាមលទ្ធផលនៃការធ្វើតេស្ត ក្នុងចំណោមជ្រូកទាំងនោះមានចំនួន ១០ ក្បាល រកឃើញថាមានជំងឺប៉េស្តជ្រូកអាហ្រ្វិក (ASF) ខណៈក្រោយមកជ្រួកទាំងនោះត្រូវអាជ្ញាធរយកទៅសម្លាប់ និងកប់ចោលនៅក្នុងជម្រៅ ៥ ម៉ែត្រ ហើយថែមទាំងបាញ់ថ្នាំសម្លាប់មេរោគលើកន្លែងកប់ និងរថយន្តដែលដឹកជ្រូកទាំងនោះផងដែរ ។

ស្របពេលជាមួយគ្នានេះ ក្រសួងកសិកម្ម និងរុក្ខាប្រមាញ់ឡាវ បានប្រកាសផ្អាកការនាំចូលសាច់ជ្រូកពីប្រទេសថៃ និងវៀតណាមកាលពីខែមីនា អំឡុងពេលមានការផ្ទុះឡើងនៃជំងឺប៉េស្តជ្រូកអាហ្វ្រិកនៅក្នុងប្រទេសទាំងពីរ ។

ដូចគ្នានេះដែរ ប្រទេសចិន និងថៃ ក៏បានហាមឃាត់ការនាំចូលសាច់ជ្រូក និងផលិតផលជ្រូកពីប្រទេសឡាវផងដែរក្នុងឆ្នាំ ២០១៩ បន្ទាប់ពីការផ្ទុះជំងឺប៉េស្តជ្រូកអាហ្រ្វិកជាលើកដំបូង ៕

ប្រែសម្រួល ៖ នាង រតនៈ

ប្រភព៖ Laotian Times

ចុចអាន៖ មីយ៉ាន់ម៉ា ដោះលែងអ្នកទោសនយោបាយ ជាង២ពាន់នាក់ អបអរពិធីបុណ្យពិសាខបូជា