ថៃ បារម្ភផ្ទុះរដ្ឋប្រហារ ក្រោយការបោះឆ្នោត

អ្នកនយោបាយ និងបញ្ញវ័ន្តសាថៃ បានចេញមុខប្រឆាំងដាច់ខាត រាល់ការប៉ុនប៉ងបង្កើតរដ្ឋាភិបាលសំឡេងភាគតិចបន្ទាប់ពីការបោះឆ្នោតថ្ងៃទី១៤ខែឧសភា ដោយព្រមានថា ការធ្វើបែបនេះ អាចបង្កឲ្យមានបាតុកម្មនៅតាមផ្លូវឈានដល់ការផ្ទុះរដ្ឋប្រហារមួយទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការព្រមាននេះកើតឡើង បន្ទាប់ពីឧបនាយករដ្ឋមន្ត្រីលោក Wissanu Krea-ngam កាលពីថ្ងៃពុធ បានច្រានចោលលទ្ធភាពនៃចន្លោះប្រហោងនយោបាយ ឬភាពជាប់គាំងដែលអាចកើតឡើងក្រោយការបោះឆ្នោត។

ទោះបី​ជា​យ៉ាង​ណាក៏ដោយ លោក​បានបង្ហាញក្តី​ព្រួយ​បារម្ភ​ថា ការ​បង្កើត​រដ្ឋាភិបាល​ថ្មី ​អាច​នឹង​ចំណាយ​ពេល​យូរ​ជាង​ធម្មតា។ ថ្វីបើលោកជឿជាក់ថា គណបក្សណាដែលឈ្នះអាសនៈសភាភាគច្រើនអាចបង្កើតរដ្ឋាភិបាលថ្មីបានក៏ដោយ ប៉ុន្តែលោកនៅតែមិនច្បាស់ពាក់ព័ន្ធរឿងដែលថា គណបក្សឈ្នះឆ្នោត ទទួលបានអាសនៈតិចជាងមុន ហើយត្រូវធ្វើការដើម្បីបង្កើតរដ្ឋាភិបាលចម្រុះ។

យ៉ាងណាក្តី អនុប្រធានគណបក្សប្រជាធិបតេយ្យ លោក Ongart Klampaiboon បាននិយាយថា ការអត្ថាធិប្បាយរបស់លោក Wissanu គឺគ្រាន់តែជាទ្រឹស្តីប៉ុណ្ណោះ ប៉ុន្តែនៅក្នុងការអនុវត្តជាក់ស្តែង ការបង្កើតរដ្ឋាភិបាលសំឡេងភាគតិចគឺមិនទំនងឡើយ។

លោក Ongart បញ្ជាក់ថា “ក្រោយការបោះឆ្នោត គណបក្សនានានឹងព្យាយាមប្រមូលការគាំទ្រ និងទទួលបានអាសនៈសភាភាគច្រើន ឬលើសពី២៥០ ដើម្បីបង្កើតរដ្ឋាភិបាលចម្រុះ។ គណបក្សណាដែលមិនធ្វើដូច្នេះ ត្រូវតែទទួលតួនាទីជាបក្សប្រឆាំង ព្រោះពួកគេស្ថិតក្នុងក្រុមសំឡេងភាគតិច”។

លោកបន្តថា “ប្រសិនបើគណបក្សក្នុងក្រុមសំឡេងភាគតិច ព្យាយាមបង្កើតរដ្ឋាភិបាលសំឡេងភាគតិច ហើយពឹងផ្អែកលើការគាំទ្រពីសមាជិកព្រឹទ្ធសភាចំនួន២៥០នាក់ ដើម្បីបោះឆ្នោតជ្រើសរើសបេក្ខជននាយករដ្ឋមន្ត្រីដែលពួកគេតែងតាំងនោះ រដ្ឋាភិបាលបែបនេះមិនមានស្ថិរភាពឡើយ ហើយអាចចាញ់ក្នុងការបោះឆ្នោតសម្តែងសេចក្តីមិនទុកចិត្ត ឬការបោះឆ្នោតលើវិក័យប័ត្រហិរញ្ញវត្ថុសំខាន់ៗ។ ប្រសិនបើបេក្ខជននោះចាញ់ឆ្នោត រូបគេមានកាតព្វកិច្ចត្រូវលាលែងពីតំណែង”។

ស្របពេលជាមួយគ្នានោះ មេដឹកនាំគណបក្ស Chartpattanakla លោក Korn Chatikavanij ក៏បានបញ្ជាក់ផងដែរថា គណបក្សរបស់លោក នឹងមិនចូលរួមជាមួយរដ្ឋាភិបាលសំឡេងភាគតិច ដែលត្រូវការជំនួយពីសមាជិកព្រឹទ្ធសភា ដើម្បីជ្រើសរើសនាយករដ្ឋមន្ត្រីនោះទេ។ ជំហររបស់យើងគឺច្បាស់។ យើងនឹងមិនចូលរួមជាមួយរដ្ឋាភិបាលជនជាតិភាគតិចណាមួយឡើយ៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ កូនស្រីលោក ថាក់ស៊ីន ប្រឈមពាក្យបណ្ដឹង មុនការបោះឆ្នោត