ប្រទេសមួយនៅ អឺរ៉ុប កាន់កាប់ទ្រព្យសម្បត្តិ រុស្ស៊ី ជាង ៨ ពាន់លានដុល្លារ

ចាប់តាំងពីការដាក់ទណ្ឌកម្មបង្កកទ្រព្យសម្បត្តិរុស្ស៊ីមកដល់បច្ចុប្បន្ននេះ, រដ្ឋាភិបាលប្រទេសស្វីសបញ្ជាក់ថាបានកាន់កាប់ទុនបម្រុង និងទ្រព្យសម្បត្តិរបស់ធនាគារកណ្តាលរុស្ស៊ី រហូតដល់ជាង ៨.៣ ពាន់លានដុល្លារ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋាភិបាលបាននិយាយនៅក្នុងសេចក្តីថ្លែងការណ៍មួយថា ក្រុមប្រឹក្សាសហព័ន្ធត្រូវបានជូនដំណឹងអំពីរឿងនេះកាលពីថ្ងៃព្រហស្បតិ៍ បន្ទាប់ពីបានសម្រេចកាលពីថ្ងៃទី២៩ ខែមីនា ត្រូវរាយការណ៍លើប្រធានបទនៃទុនបម្រុង និងទ្រព្យសម្បត្តិរបស់រុស្ស៊ី ។

បុគ្គល អង្គការ និងអង្គភាពដែលកាន់កាប់ គ្រប់គ្រង ឬជាដៃគូរបស់ធនាគារកណ្តាលនៃទុនបម្រុង និងទ្រព្យសម្បត្តិរបស់សហព័ន្ធរុស្ស៊ី ត្រូវបានតម្រូវឲ្យផ្តល់ព័ត៌មាននេះដល់លេខាធិការដ្ឋានរដ្ឋសម្រាប់កិច្ចការសេដ្ឋកិច្ចត្រឹមថ្ងៃទី១២ ខែមេសា កន្លងទៅ ។

ចំពោះកាតព្ធកិច្ចរាយការណ៍នេះ ក៏ត្រូវបានអនុវត្តដូចគ្នាដែរនៅក្នុងសហភាពអឺរ៉ុប (EU) ស្របតាមការដាក់ទណ្ឌកម្មរបស់ EU ប្រឆាំងនឹងប្រទេសរុស្ស៊ី ។

ចាប់តាំងពីថ្ងៃទី២៥ ខែមីនា ឆ្នាំ ២០២២ ប្រតិបត្តិការទាំងអស់ដែលពាក់ព័ន្ធនឹងការគ្រប់គ្រងទុនបម្រុង និងទ្រព្យសម្បត្តិរបស់ធនាគារកណ្តាលសហព័ន្ធរុស្ស៊ី បានក្លាយទៅជាក្រៅច្បាប់ ដូច្នេះទ្រព្យសម្បត្តិរបស់ធនាគារត្រូវបានបង្កក ចំពេលរុស្ស៊ីផ្តើមលុកលុយអ៊ុយក្រែនដែលបានផ្ទុះឡើងកាលពីថ្ងៃទី២៤ ខែកុម្ភៈឆ្នាំមុនមកម្ល៉េះ ។

ចំពោះទ្រព្យបង្កកនេះ រដ្ឋាភិបាលស្វីស តាមដានយ៉ាងដិតដល់ចំពោះការជជែកដេញដោលរបស់ EU ថាតើទ្រព្យសម្បត្តិទាំងនេះ គួរត្រូវបានវិនិយោគ ក៏ដូចជាយកប្រាក់ទាំងនោះ ទៅកសាងអ៊ុយក្រែនវិញឬយ៉ាងណា ៕

ប្រែសម្រួល៖ នាង រតនៈ

ចុចអាន៖ Anadolu