មេទ័ពជើងគោក ថៃ ស្នើលុបពាក្យ “រដ្ឋប្រហារ” ចេញពីវចនានុក្រមកងទ័ព

លោកនាយឧត្តមសេនីយ៍ ណារ៉ុងផាន់ ចីតកែវថែ (Narongpan Jitkaewthae) មេបញ្ជាការកងទ័ពជើងគោកថៃបានស្នើដល់អ្នកសារព័ត៌មានឲ្យឈប់សួរសំណួរអំពីការធ្វើបដិវត្តន៍ ឬធ្វើរដ្ឋប្រហារតទៅទៀត បន្ទាប់ពីការបោះឆ្នោតជាតិ ហើយលោកក៏បានស្នើឲ្យលុបពាក្យទាំងនេះចេញពី “វចនានុក្រមកងទ័ព” ផងដែរ ។

លោក ណារ៉ុងផាន់ បញ្ជាក់ថា នៅក្នុងករណីមានភាពចលាចល បន្ទាប់ពីការបោះឆ្នោតនៅថ្ងៃអាទិត្យនេះ គឺវាមិនអាចទៅរួចទេដែលយោធានឹងធ្វើរដ្ឋប្រហារដូចកាលពីអតីតកាលនោះ ព្រោះថា ពាក្យ “ការធ្វើបដិវត្តន៍ ឬធ្វើរដ្ឋប្រហារ” លែងមាននៅក្នុងចិត្តកងទ័ពទៀតហើយ ។

មេទ័ពថៃរូបនេះលើកឡើងទៀតថា លោកសូមអំពាវនាវដល់កងកម្លាំងទាំងអស់នាំគ្នាចេញទៅ​ប្រើ​សិទ្ធិក្នុងការ​បោះឆ្នោតជាតិ​នៅ​ថ្ងៃ​ទី​១៤ ខែឧសភា ឲ្យបានគ្រប់ៗគ្នា ពីព្រោះ​ជា​កាតព្វកិច្ច​របស់​ខ្លួន​ក្នុង​ការ​គាំទ្រ​លទ្ធិ​ប្រជាធិបតេយ្យ ដែល​មាន​ព្រះមហាក្សត្រ​ជា​ប្រមុខ ។

គួរបញ្ជាក់ថា ថៃបានជួបរដ្ឋប្រហារយោធាជោគជ័យចំនួន ១២ ដងមកហើយ ចាប់តាំងពីប្រទេសនេះប្តូរទៅជារបបរាជាធិបតេយ្យអាស្រ័យរដ្ឋធម្មនុញ្ញក្នុងឆ្នាំ ១៩៣២ ខណៈរដ្ឋប្រហារចុងក្រោយ គឺដឹកនាំដោយនាយករដ្ឋមន្ត្រីដែលកំពុងកាន់អំណាចលោក ប្រាយុទ្ធ ចាន់អូចា ប្រឆាំងនឹងរដ្ឋាភិបាលរបស់លោកស្រី យីងឡាក់ ស៊ីណាវ៉ាត់ត្រា ដែលត្រូវជាប្អូនស្រីរបស់លោក ថាក់ស៊ីន កាលពីឆ្នាំ ២០១៤ ៕

ប្រែសម្រួលដោយ ៖ ជីវ័ន្ត

ប្រភព ៖ The Standard

ចុចអាន ៖ គណៈកម្មាធិការរៀបចំការបោះឆ្នោត ថៃ ដាក់ចេញគោលការណ៍ចំនួន ៨ ក្នុងការរាប់សន្លឹកឆ្នោត