ព័ត៌មានអន្ដរជាតិ

សារព័ត៌មានបរទេស ឃ្លាំមើលករណីស៊ើបអង្កេតលើលោក ភីថា ទាក់ទិនការកាន់កាប់ភាគហ៊ុនប្រព័ន្ធផ្សព្វផ្សាយ

បានផុស

២ years មុន

នៅ

ថ្ងៃអង្គារ ១៣ មិថុនា ២០២៣

ដោយ

ប្រព័ន្ធផ្សព្វផ្សាយបរទេសនៅតែបន្តឃ្លាំមើលពីវឌ្ឍនភាពនយោបាយថៃ ជាពិសេសលើករណីរបស់គណៈកម្មការរៀបចំការបោះឆ្នោតថៃ (EC) ដែលកំពុងត្រៀមស៊ើបអង្កេតករណីរបស់លោក ភីថា លីមចារ៉ើនរ៉ាត់ មេដឹកនាំគណបក្សចលនាឆ្ពោះទៅមុខ ថាតើអាចនឹងល្មើសច្បាប់បោះឆ្នោតឬយ៉ាងណា ដោយសារតែលោកការកាន់កាប់ភាគហ៊ុនក្នុងប្រព័ន្ធផ្សព្វផ្សាយ (ITV) ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើទោះជាគណបក្សចលនាឆ្ពោះទៅមុខ ទទួលបានសំឡេងឆ្នោតច្រើនជាងគេក្នុងការបោះឆ្នោតថ្មីៗកន្លងទៅនេះ ហើយលោក ភីថា បានក្លាយជាបេក្ខជននាយករដ្ឋមន្ត្រីថ្មីក៏ដោយ ប៉ុន្តែផ្លូវឈានទៅរកការបង្កើតរដ្ឋាភិបាលរបស់គណបក្សចលនាឆ្ពោះទៅមុខក៏ជួបប្រទះនឹងឧបសគ្គផងដែរ ។

យ៉ាងណាក៏ដោយ គណបក្សមួយនេះបានឆ្លងផុតឧបសគ្គមួយចំនួនធំហើយផងដែរ ប៉ុន្តែទីភ្នាក់ងារសារព័ត៌មាន Reuters បាននិយាយថា បញ្ហាដែលគណៈកម្មាធិការរៀបចំការបោះឆ្នោតថៃ (EC) បាននិងកំពុងត្រៀមក្នុងការស៊ើបអង្កេតនោះ គឺពាក់ព័ន្ធទៅនឹងការខ្វះលក្ខណៈសម្បត្តិរបស់លោក ភីថា ដើម្បីឈរឈ្មោះបោះឆ្នោតឬយ៉ាងណា?

ដោយសារតែការកាន់កាប់ភាគហ៊ុននៅក្នុងក្រុមហ៊ុនប្រព័ន្ធផ្សព្វផ្សាយ ប៉ុន្តែនៅតែបន្តឈរឈ្មោះបោះឆ្នោតបានរហូតដល់ចប់ដំណើរការបោះឆ្នោត ទាំងនេះ គឺជារឿងដែលអាចនឹងធ្វើឲ្យផ្លូវនយោបាយរបស់លោក ភីថា ដែលជាបេក្ខជននាយករដ្ឋមន្ត្រីវ័យក្មេងរូបនេះ អាចឈានដល់ផ្លូវបញ្ចប់បាន ។

ទាក់ទិននឹងរឿងរ៉ាវនេះដែរលោក ភីថា មិនបារម្ភអំពីបញ្ហានេះនោះទេ ដោយលោកអះអាងថា ភាគហ៊ុនដែលលោកបានផ្ទេរទៅឲ្យប្អូនរួចហើយនោះជាកម្មសិទ្ធិរបស់ក្រុមហ៊ុនប្រព័ន្ធផ្សព្វផ្សាយដែលមិនបានដំណើរការអាជីវកម្មដូចដែលបានចុះបញ្ជីអស់រយៈពេលជាយូរមកហើយ ។ ប៉ន្តែប្រសិនបើការស៊ើបអង្កេតរបស់ EC ឈានដល់ការប្រកាសសាលក្រមថា ប្រធានគណបក្សចលនាឆ្ពោះទៅមុខរូបនេះ មានទោសពិតដូចការចោទប្រកាន់មែននោះ នឹងត្រូវដកសិទ្ធិ ត្រូវជាប់ពន្ធនាគាររហូតដល់ ១០ ឆ្នាំ និងត្រូវដកសិទ្ធិនយោបាយ ២០ ឆ្នាំ ។

ដោយឡែកទីភ្នាក់ងារសារព័ត៌មាន Al Jazeera ក៏បានរាយការណ៍ដែរថា បេក្ខជននាយករដ្ឋមន្ត្រីមកពីគណបក្សចលនាឆ្ពោះទៅមុខ បានទទួលស្គាល់ថា លោកពិតជាបានទទួលភាគហ៊ុនប្រព័ន្ធផ្សព្វផ្សាយ (ITV) ពីឪពុករបស់លោកប្រាកដមែន ប៉ុន្តែក្រុមហ៊ុននេះមិនបានដំណើរផ្សាយចាប់តាំងពីឆ្នាំ ២០០៧ មកម្ល៉េះ និងបានបដិសេធថា លោកមិនបានប្រព្រឹត្តល្មើសអ្វីឡើយ ហើយគណបក្សចលនាឆ្ពោះទៅមុខក៏គ្មានការព្រួយបារម្ភអ្វីនោះដែរ ៕

ប្រែសម្រួលដោយ ៖ គង់ សំអាន

ប្រភព ៖ VOA Thai

ចុចអាន ៖ មកដឹងប្រាក់ខែពលករ កម្ពុជា និងប្រទេសផ្សេងទៀតដែលធ្វើការនៅ ថៃ