ពិភពលោកមានសង្ឃឹមខ្ពស់ហើយ! អត្រាឆ្លងកូវីដនៅប្រទេសមួយ ធ្លាក់ចុះដល់ទៅ៦០ភាគរយក្រោយចាក់វ៉ាក់សាំង

ការឆ្លងមេរោគកូរ៉ូណានៅក្នុងប្រទេសអ៊ីស្រាអែលបានធ្លាក់ចុះប្រហែល៦០ភាគរយ ក្នុងចំណោមអ្នកចាក់វ៉ាក់សាំងដែលមានអាយុលើ៦០ឆ្នាំ ដែលនេះបានផ្តល់ក្តីសង្ឃឹមថា ការចាក់វ៉ាក់សាំងពិតជាមានប្រសិទ្ធភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃសៅរ៍ ក្រុមអ្នកថែទាំសុខភាពអ៊ីស្រាអែលបាននិយាយថា ករណីឆ្លងវីរុសកូរ៉ូណាបានធ្លាក់ចុះក្នុងចំណោមមនុស្សអាយុលើស៦០ឆ្នាំ ដែលត្រូវបានចាក់វ៉ាក់សាំង Pfizer BioNTech។

មជ្ឈមណ្ឌលស្រាវជ្រាវនិងច្នៃប្រឌិត KSM Maccabi បាននិយាយថា មានការថយចុះគួរឲ្យកត់សម្គាល់នៃការឆ្លងមេរោគកូរ៉ូណាក្នុងចំណោមមនុស្ស អាយុជាង៦០ឆ្នាំដែលបានចាក់វ៉ាក់សាំងចន្លោះពីថ្ងៃទី១៩ដល់២៤ខែធ្នូ។

ការវិភាគបានមើលទៅលើទិន្នន័យនៃមនុស្សជាង៥០,០០០នាក់នៅក្នុងក្រុមអាយុនេះ។ ប្រហែល៣០ភាគរយនៃប្រជាជនអ៊ីស្រាអែលត្រូវបានចាក់វ៉ាក់សាំងដូសដំបូង។

លោក Sir Patrick Vallance បានច្រានចោលក្តីព្រួយបារម្ភដែលលើកឡើងនៅក្នុងប្រទេសអ៊ីស្រាអែលថា វ៉ាក់សាំង Pfizer តែមួយដូសមិនអាចមានប្រសិទ្ធភាពដូចការគិតទុកនោះទេ។

ប្រធានទីប្រឹក្សាវិទ្យាសាស្ត្ររូបនេះបានប្រាប់សន្និសីទកាសែត Downing Street ថា “ទាំងនេះគឺជាព័ត៌មានបឋមចេញពីក្រុមមនុស្សដែលមិនបានតាមដានប្រជាជនអស់រយៈពេលជាយូរមកហើយ។ យើងបានពិភាក្សាជាមួយទីប្រឹក្សាអ៊ីស្រាអែល ហើយពួកគេរំពឹងថានឹងទទួលបានព័ត៌មានបន្ថែមទៀតនៅប៉ុន្មានសប្តាហ៍ខាងមុខនេះ”។

គួរបញ្ជាក់ថា គិតត្រឹមយប់ថ្ងៃអាទិត្យទី២៤ខែមករា ប្រទេសអ៊ីស្រាអែល បានរាយការណ៍ករណីឆ្លងកូវីដចំនួន៥៩៥,០៩៧ករណី ស្លាប់៤,៣៦១នាក់និងជាសះស្បើយ៥១៥,៦៨៣នាក់៕

ប្រែសម្រួលដោយ៖ Vann Vann

ប្រភព៖ Mirror