រុស្ស៊ី បង្ហាញលក្ខខណ្ឌ វិលត្រលប់ទៅសន្ធិសញ្ញាអាវុធនុយក្លេអ៊ែរ New START វិញ

ទីក្រុងមូស្គូ នៅតែប្តេជ្ញាចំពោះការសម្រេចចិត្តរបស់ខ្លួន ក្នុងការផ្អាកសន្ធិសញ្ញាកាត់បន្ថយអាវុធយុទ្ធសាស្ត្រ (New START) ដែលដាក់កម្រិតលើឃ្លាំងអាវុធនុយក្លេអ៊ែររបស់អាមេរិក និងរុស្ស៊ី។ នេះបើតាមសម្តីអនុរដ្ឋមន្ត្រីការបរទេសរុស្ស៊ីលោក Sergey Ryabkov បានប្រាប់សារព័ត៌មាន TASS កាលពីថ្ងៃព្រហស្បតិ៍ទី១៥ខែមិថុនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អនុរដ្ឋមន្ត្រីបានពន្យល់ថា ជំហររបស់រុស្ស៊ីលើសន្ធិសញ្ញា New START នៅតែមិនផ្លាស់ប្តូរ ហើយលក្ខខណ្ឌនៃការបន្តកិច្ចព្រមព្រៀងនឹងអាចកើតមាន លុះត្រាតែសហរដ្ឋអាមេរិក ផ្លាស់ប្តូរអាកប្បកិរិយារបស់ខ្លួនជាមុនសិន ។

លោកសង្កត់ធ្ងន់ថា “ការផ្អាក New START នៅតែចូលជាធរមានពេញលេញ ហើយបើចង់ឲ្យយើងផ្លាស់ប្តូរការសម្រេចចិត្តនេះ លុះត្រាតែសហរដ្ឋអាមេរិក ឈប់ធ្វើសកម្មភាពអរិភាពដាក់ប្រទេសរុស្ស៊ីជាមុនសិន” ។

អ្នកការទូតរូបនេះបង្ហើបថា ភាគីទាំងពីរនៃកិច្ចព្រមព្រៀងគ្រប់គ្រងអាវុធស្នូលនេះ បានរៀបចំកិច្ចពិភាក្សាមួយចំនួនលើបញ្ហានេះ ក្នុងរយៈពេលប៉ុន្មានខែចុងក្រោយ។ ទោះ​បី​ជា​យ៉ាង​ណាក៏ដោយ កិច្ច​ពិភាក្សា​មិន​បាន​ទទួល​បាន​ផ្លែផ្កាអ្វីឡើយ។

លោក Ryabkov និយាយថា “ក្នុងអំឡុងពេលនៃការផ្លាស់ប្តូរទស្សនៈគ្នា ភាគីទាំងពីរបានអះអាងឡើងវិញនូវជំហរមិនខ្វែងគំនិត និងប្រឆាំងគ្នា” ។

គួរបញ្ជាក់ថា សន្ធិសញ្ញា New Start គឺជាកិច្ចព្រមព្រៀងគ្រប់គ្រងអាវុធនៅសល់ចុងក្រោយរវាងទីក្រុងមូស្គូ និងវ៉ាស៊ីនតោន បន្ទាប់ពីសហរដ្ឋអាមេរិក បានដកខ្លួនចេញពីសន្ធិសញ្ញា INF និង Open Skies ក្រោមការដឹកនាំរបស់អតីតប្រធានាធិបតី លោក ដូណាល់ ត្រាំ។

កិច្ចព្រមព្រៀងនេះ កំណត់ការស្តុកអាវុធនុយក្លេអ៊ែររបស់ប្រទេសទាំងពីរ ហើយអាចឲ្យពួកគេត្រួតពិនិត្យទីតាំងយោធារបស់គ្នាទៅវិញទៅមក ដើម្បីបញ្ជាក់ពីការអនុលោមតាមច្បាប់៕

ប្រែសម្រួល៖ Vann Vann

ប្រភព៖ RT

ចុចអាន៖ បេឡារុស ថា នុយក្លេអ៊ែររុស្ស៊ី នៅទឹកដីរបស់ខ្លួន ខ្លាំងជាងបរមាណូ ដែលអាមេរិក ទម្លាក់លើ ហ៊ីរ៉ូស៊ីម៉ា ៣ដងឯណោះ