ពូទីន៖ ណាតូ អាចពង្រីកផែនការនៅអាស៊ី ដើម្បីបម្រើតម្រូវការ របស់អាមេរិក 

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានអះអាងកាលពីថ្ងៃអង្គារទី១៥ខែសីហាថា អង្គការណាតូ អាចនឹងសម្រេចបាននូវការធ្វើសមាហរណកម្មជាមួយកតិកាសញ្ញាសន្តិសុខរវាងសហរដ្ឋអាមេរិក ចក្រភពអង់គ្លេស និងអូស្ត្រាលី ហៅកាត់ AUKUS ខណៈទីក្រុងវ៉ាស៊ីនតោន ខិតខំកែទម្រង់តំបន់អាស៊ីប៉ាស៊ីហ្វិក ដើម្បីបម្រើតម្រូវការផ្ទាល់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងសន្និសីទសន្តិសុខអន្តរជាតិលើកទី២១នៅទីក្រុងមូស្គូ មេដឹកនាំរុស្ស៊ីនិយាយថា “ក្នុងចំណោមរបស់ផ្សេងទៀត សហរដ្ឋអាមេរិកកំពុងស្វែងរកកំណែទម្រង់ប្រព័ន្ធ នៃអន្តររដ្ឋដែលបានអភិវឌ្ឍនៅក្នុងតំបន់អាស៊ីប៉ាស៊ីហ្វិក។ ការអំពាវនាវឲ្យបង្កើតយុទ្ធសាស្ត្រឥណ្ឌូ-ប៉ាស៊ីហ្វិក គឺមានគោលបំណងសំខាន់ ក្នុងការបង្កើតសមាគមនយោបាយ-យោធា ដែលគ្រប់គ្រងដោយទីក្រុងវ៉ាស៊ីនតោន”។

លើសពីនេះ ដោយសំដៅទៅកតិកាសញ្ញា ដែលព្រមព្រៀងកាលពីចុងឆ្នាំ២០២១ រវាងទីក្រុងវ៉ាស៊ីនតោន ឡុងដ៍ និងកង់បេរ៉ា, លោក ពូទីន បានសង្កត់ធ្ងន់ថា “យើងមិនបដិសេធទេដែលថា អ្វីៗទាំងនោះនឹងនាំទៅដល់ការធ្វើសមាហរណកម្មពេញលេញ នៃកងកម្លាំងណាតូជាមួយរចនាសម្ព័ន្ធដែលត្រូវបានបង្កើតឡើងដោយប្លុក AUKUS”។

ស្របពេលជាមួយគ្នានោះ លោកប្រធានាធិបតី បានព្រមានអំពីអាណានិគមនិយមខាងលិច ដឹកនាំដោយទីក្រុងវ៉ាស៊ីនតោន ដែលកំពុងព្យាយាមពន្យារពេលដល់ការបង្កើតពិភពលោកពហុប៉ូល ហើយបង្កអស្ថិរភាព និងបណ្តាលឲ្យមានភាពតានតឹងនៅទូទាំងតំបន់ផ្សេងៗ។

ទោះបីជាយ៉ាងណាក៏ដោយ លោក ពូទីន និយាយថា រុស្ស៊ីនៅតែប្តេជ្ញាចិត្តកាត់បន្ថយការប្រឈមមុខដាក់គ្នាក្នុងកម្រិតពិភពលោកនិងតំបន់ ហើយបន្តខិតខំអភិវឌ្ឍសណ្តាប់ធ្នាប់ពិភពលោកពហុប៉ូល ដោយផ្អែកលើអាទិភាពនៃបទដ្ឋាន និងគោលការណ៍នៃច្បាប់អន្តរជាតិ ក៏ដូចជាកិច្ចសហប្រតិបត្តិការប្រកបដោយការស្ថាបនា និងការជឿទុកចិត្តផងដែរ៕

ប្រែសម្រួល៖ Vann Vann

ប្រភព៖ RT

ចុចអាន៖ លោក ពូទីន៖ ណាតូ មិនព្រមពិភាក្សាជាមួយ រុស្ស៊ី