ថៃ ចាប់ខ្លួនគូស្នេហ៍ ដែលបើកបណ្តាញផ្លូវភេទ ទាក់ទងនារីឲ្យភ្ញៀវបរទេស

ប៉ូលិសថៃ បានចាប់ខ្លួនជនជាតិអាមេរិកម្នាក់ និងមិត្តស្រីរបស់គាត់ជាជនជាតិថៃ ដោយសារអ្នកទាំងពីរ បើកគេហទំព័រដែលផ្តល់សេវាពេស្យាចារនៅក្នុងទីក្រុងទេសចរណ៍ជាច្រើន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជន​ជាតិ​អាមេរិក​អាយុ​៤៨​ឆ្នាំ ​ត្រូវ​បាន​គេ​ចាប់​ខ្លួន​នៅ​ផ្ទះ​របស់​គាត់ ​ក្នុង​ទីក្រុង​រមណីយដ្ឋាន Hua Hin នៃ​ខេត្ត Prachuap Khiri Khan ខណៈមិត្ត​ស្រី​ជនជាតិ​ថៃ​អាយុ ៣៤ ឆ្នាំ​ឈ្មោះ Kanya  ត្រូវ​បាន​ចាប់​ខ្លួន​នៅ​អាកាសយានដ្ឋាន​សុវណ្ណភូមិ ​ក្នុង​ទីក្រុង​បាងកក។

ប៉ូលិស បានទទួលពាក្យបណ្ដឹងពីអ្នកទេសចរបរទេសថា នារីបម្រើសេវាកម្មដែលពួកគេទាក់ទងតាមគេហទំព័រ Absolute Angels Bangkok មានប្រើប្រាស់គ្រឿងញៀន និងលួចទ្រព្យសម្បត្ដិរបស់ពួកគេ។

ក្រោយមក ការស៊ើបអង្កេតក៏រកឃើញថា គេហទំព័រ ដែលផ្សាយពាណិជ្ជកម្មខ្លួនឯងថា សេវាផ្តល់ស្រ្តីកំដរក្នុងរាជធានីបាងកក និងទីក្រុងទេសចរណ៍ផ្សេងទៀត គឺបានផ្តល់សេវាកម្មពេស្យាចារដោយបើកចំហដល់ភ្ញៀវទេសចរបរទេស។

លោកឧត្តមសេនីយ៍ឯក Phakphumphiphat Sujjapan មេបញ្ជាការការិយាល័យអន្តោប្រវេសន៍បានប្រាប់សន្និសីទសារព័ត៌មានកាលពីថ្ងៃសុក្រថា គេហទំព័រនេះ បានទាក់ទាញការចូលទស្សនាដល់ទៅ ៤២៩ ៥០០ដងក្នុងខែកក្កដា ហើយមានបញ្ជីឈ្មោះស្រ្តីកំដរប្រហែល៨០នាក់នៅតាមកន្លែងជាច្រើន រួមមានទីក្រុងបាងកក ប៉ាតាយ៉ា ភូកេត ឈៀងម៉ៃ និងហួហ៊ីន។

តាមការរកឃើញរបស់ប៉ូលិស, Kanya គឺជាអ្នកគ្រប់គ្រងគេហទំព័រ ដែលទទួលខុសត្រូវទទួលយកការកក់ និងរៀបចំការណាត់ជួបរវាងក្មេងស្រីនិងអតិថិជន ខណៈបុរសជនជាតិអាមេរិក ជាអ្នកទទួលខុសត្រូវចំពោះបញ្ហាបច្ចេកទេសពាក់ព័ន្ធនឹងគេហទំព័រ។ ពួកគេទាំងពីរទទួលបាន ៤០% នៃថ្លៃសេវាដែលអតិថិជនបង់។

លើសពីនេះ ប៉ូលិស​បាន​រឹបអូស​កុំព្យូទ័រ​ចំនួន៤គ្រឿង ឯកសារ​ពាក់ព័ន្ធ និង​វីឡា​តម្លៃ១៥លាន​បាត។ ប៉ូលិសក៏រឹបអូសរថយន្ត Mercedes-Benz មួយគ្រឿងតម្លៃ៣.៥លានបាត រថយន្តហុងដាតម្លៃ១.៨លានបាតមួយគ្រឿង សៀវភៅគណនីធនាគារ១៤ក្បាលដែលមានប្រាក់ប្រហែល៩លានបាត និងភាគហ៊ុនថៃមានតម្លៃ៤០លានបាតផងដែរ៕

ប្រែសម្រួល៖ Vann Vann

ប្រភព៖ Nation

ចុចអាន៖ អាជ្ញាធរខណ្ឌពោធិ៍សែនជ័យ ចុះនាំខ្លួននារីៗរកស៊ីផ្លូវភេទនៅផ្លូវវេងស្រេងដែលបង្កភាពអនាធិបតេយ្យ